Nongpoh, Naiwieng 06 : Uwei na u nongïalam ka UDP na Umsawkhwan Sub Circle ka Umsning Constituency u la kynnoh syndon da kaba ong, “ Ba ngim poi pyrkhat ba wat u Bah Metbah Lyngdoh, President ka UDP ha ka jylla u dang biej ïa ka sbai rupa.
Une u nongïalam ka UDP na Umsning Constiteuncy, u dei u Bah Shemphang Nongrum bad u la kren bad kynnoh ruh pyrshah ïa u Bah Metbah Lyngdoh, President ka UDP hapoh ka jylla, ka dei hadien ba ka UDP ka la pynduh ticket ïa u Bah Donkupar Sumer na Umsning Constituency bad la ai ïa ka ticket sha u Bah Sunshine Makri, uba dang shu wan pynïasoh dang shen sha ka UDP ha Umsning Constituency.
Utei u nongïalam ka UDP na Umsning u la kren ruh pyrshah ïa u Bah Metbah ka dei ha ka jingïalang kaba la long hynnin ka sngi ha Umsning, ba u Bah Donkupar Sumer lem bad ki nongïalam bad ki nongkyrshan ki la mih syndon na ka UDP kaba dei halor ka jingkynoh ba la leh donbor da ki nongïalam ka UDP Ri Bhoi bad ki nongïalam ka UDP ha ka jylla kiba ym bud satia katkum ki riti treikam ka UDP bad ki la shu phai khmat tang ïa kita ki ba don spah don phew bad khlem da pyrkhat ïa ki nongïalam bad ki nongkyrshan ka UDP.
Shuh shuh, utei u nongïalam ym tang ba u la kynnoh ba u Bah Metbah Lyngdoh u ba la biej ïa ka sbai ka rupa halor ka jingai tiket ka party UDP ha Umsning bad u la kynthoh pyrshah ruh wat ïa u Bah Donbok Khymdeit, uba dei u President ka UDP Ri Bhoi, kiba la leh sop sop ban ai ticket ïa u Bah Sunshine Makri bad kyntait pat ïa u Bah Donkupar Sumer, uba dei u Working President ka UDP ha Ri Bhoi bad uba bat ruh ïa ka kyrdan President ka UDP ha Umsning Constituency.
