Buh maw nongrim u MLA ban maramot ïa ka surok RBBJ ha shnong ba khappud bad ka ri Bangladesh

Khliehriat, Naiwieng 06 : U bah Kyrmen Shylla uba dei ruh u myntri ka sorkar jylla myn ha ka 4 tarik mynta u bnai u la plie paidbah ïa u maw nongrim ha shnong Bataw, une u maw nongrim u long ban sdang noh ban shna bad pynbha ïa ka surok Rymbai Bataw Borghat Jalalpur (RBBJ Road), ka surok kaba don ha ki thaiñ khappud kaba la jot rathai.
Kane ka surok RBBJ ka kynthup ruh ïa ki shnong kum ka shnong Umsatai,Lad Wahwapung, Pynurkba, Deiñsatlang, Lakadong, Umlynsha,Umlakdoh, Lakadong Ummat bad ka Lad Lakadong.
Haba kren kum u kongsan, u MLA jong ka Khliehriat, u bah Kyrmen Shylla u la ong ba ki don shibun bha ki kam ba bha ba la leh da ki mongmihkhmat myn ha ki por kiba la leit hapoh kine ki san phew snem jong ka jingïoh jylla, kumta dei ban burom ïa ki kam jong ki ban kumjuh ruh ban bteng bad nang ïai bteng ïa ki kam ba bha ba ki la maitphang ha ki por ba ki long ki nongmihkhmat, ha kajuh ka por u la kyntu ïa ki paidbah ba ki dei ban long kiba ïatylli bad kiba don ka jingïatreilang khnang ban poi sha ka thong, u la pynpaw ruh ka jingsngew kmen halor ka jinglah ban poi sha ka thong ha kaba ïadei bad ki kam ban maramot ïa kane ka surok ha khppud.
Ha kaba ïadei bad ka skim sam umbam dih kaba la tip kum ka Synrang Umlawe kaba ha shnong Bataw bad ki shnong ba marjan kaba hapoh ka Jal Jevan Mission (JJM) u la ong ba ka jingpyntrei ka dang ïaid shaid shaid.
U MLA barim jong ka Khliehriat Constituency, u bah Justine Dkhar, haba kren ha ka jingïalang, u la ong ba kane ka jingbuh maw nongrim ha shnong Bataw ka pyni shynna ba ki paidbah ruh ki kyrsha ïa ki kam ba bha bad ong uh ban ïoh ïa kane ka skim kam dei ka kam kaba suk ïa u nongmihkhmat ha kaba u hap ban bud dien, ban leit pan, leit kyrpad ïa u myntri rangbah bad ïa u myntri jong ka tnat PWD, na kata ka daw kum ki paidbah jong ka thaiñ ki dei ban long kiba don ka ynsiem sngew nguh halor kane ka jingioh ban shna bad maramot ïa ka surok bad kyntu ruh ba ha kane ka kynti ki paidbah kin sngewbha ban ai biang ka jingkyrshan ïa u bah Kyrmen Shylla khnang ba un pi sha ka thong ha kaba un dup lah ban pyndep ïa kiwei kiwei ki skim ruh kiba dang hap ban pyndep kiba dang sahteng.
Kumjuh ruh ha kane ka jingïalang, u S.E jong k tnat PWS (Roads) Jowai Circle, u bah B.W.Phira u la ong ba kane ka sim ka dei bn maramot lane ka Rehabilitation Of Damage pavement (MBT of RBBJ road) ha kaba la dep pyllait ïa ka mang tyngka myntaT 23,93,50,000 tyngka myn ha ka 8 tarik u nailur 2022, u la ïathuh ba ka jingpyntrei ïa kane ka surok ka long naduh ki bynta ban khlong noh ïa ka surok kaba rim bad ban shna thymmai pat naduh ka jingsiang rong ïa ka surok bad ka jingshna ïa ki nala tuid um ban buh ïa ki signboard bad kiwei kiwei ki jingpynbit pynbiang ba ka surok kan long ruh kaba neh.
Na ka liang u President jong ka Jaiñtia Students Union Southern Border Zone, u samla Ajoymeson Lyngdoh, u la pynpaw ka jingsngew khia haba u kren halor ka phang ki kam bamsap jong ka tnat PWD bad ong ba ka mang tyngka kaba T60 haduh T 70 lak tyngka la dep ban pyllait hynrei ym shym la ïohi dak jingpyntrei ha kane ka thaiñ bad ng ba na ka liang ka seng ka buh da ka jingdwa tohkit haor kane khnang ba ka kam kan ïaid beit.
Kiba la ïa don ryngkat ha kane ka sngi ki kynthup u Waheh Shnong Bataw, uba la ai ïa ka jingkren ai khublei, kumjuh ruh u Secretay shnong Batw, u bah Hosting Pajat, u Deputy CEM jong ka JHADC, u bah Lasky Rymbai, u MDC jong ka Khliehriat, u bah Finelyness Bareh bad kiwei kiwei ki riew rangbah jong ka thaiñ.
La pynshit pyn shngaiñ ia kane ka sngi da ki jingshad na ki dkhot jong ka Village Organisation Bataw bad kiwei kiwei.