Shillong, Naiwieng 06 : Kadei ha u snem 2019, ba ka sorkar Meghalaya ka la pyntreikam ïa ka buit thymmai ban buddien ïa ka koit ka khiah bad ka rukom sumar ïa ki longkmie ba armet khnang ban pyntikna ba kin kha suk ïa ki khun jong ki, ha kylleng ki bynta jong ka jylla. Katei ka MOTHER App, kaba dei ka kynja buit treikam kaba lum jingtip shaphang ki longkmie armet ka la lah ban pynkohnguh bun bha ki longkmie ba kin leit ban kha ha ki jaka sumar bad kane ka la ïarap haduh katta katta ban pynduna ïa ka jingdon ki longkmie baïap por kha khun ne kata ka Maternal Mortality Rate (MMR).
Ka jinglah jong kane ka app ban treikam kadei da ka jingai jingtip kaba biang bad kaba tikna na ki nongtrei ka tnad ka Koit ka Khiah lyngba ki ANM sha ki Doktor bad sha ki heh ka koit ka khiah ha ki distrik bad ruh ha ki bor ba peit ha ka jylla kiba ka kam jong ki ka long pat ban buddien ïa kito ki longkmie armet na ka por sha ka por namar ka paw hi bad kdew hi ha katei ka Mother App.
“Mynshwa, ka jingbuddien ïa ka koit ka khiah jong ki longkmie armet kadei kaba shitom bad jynjar bha namar ka jingbym don ïa ki jingtip kiba biang bad teng teng kaba ngi don ruh kadei ka bym da biang namar la shu lum bad thoh ha ki kot lane register,”ong u Ramkumar S, IAS, Additional Secretary ka tnad ka Koit ka Khiah ka sorkar jylla.
Katkum ka kyrwoh na ka tnad ka Koit ka Khiah la ong ba ha kaba sdang, ïa katei ka projek la pyntreikam nyngkong eh ha South West Garo Hills bad lyngba katei ka app la lap ba ka la kyntiew na ka 44persen sha ka 76 persen ki longkmie ba armet kiba leit bankha khun ha ki jaka sumar kata ruh tang ha ki 6 bnai. Bad dei na ka jingseisoh ka rukom treikam ba hadien la pyntrei kam ha baroh kawei ka jylla.
Da kaba pyndonkam ïa ka Mother App ha ki phone jong ki, ki ANM ki lah ban lum lut ïa ki jingtip shaphang ki longkmie armet kynthup naduh ka rta, ka jingma kaba ki lah ban don, ka tarik ba ki lah ban kha, ka jingleit ai tika bad ruh mynno ki leit ban checkup nangta ruh ka jaka sah bad kiwei kiwei ki jingtip. Ïa kitei ki jingtip la buh ruh ha ka dashboard jong katei ka app khnang ba ki medical officer bad ki nongtrei ka koit ka khiah ruh ki lah ban buddien lang khamtam ïa kito ki longkmie ba don jingma bad kiba lajan kha.
U Dr. Tyngshain Sutnga, Medical Officer jong ka Bhoirymbong CHC, u ju peit man ka por ïa ka dashboard jong ka MOTHER ha ka shisngi ban buddien ïa ka jingdon ki longkmie armet. Da kaba leh kumtei u lah ban tip pat katno ngut ki longkmie armet kiba don jingma ha ka jaka ba u dei peit khnang ba un lah pat ban pynkynmaw ïa ki ba kin wan tista ban checkup ba kin lah pat ban kha suk ïa ki khun jong ki.
U ong ruh ba ka MOTHER App dangshen ka la pyllait im ïa kawei ka longkmie kaba la don jingma kaba la kyntait ban leit kha ha jaka sumar ïa i khun. La ong ba ïa katei ka jingjïa lashim lypa ba kadei ka high-risk pregnancy lane ka jingpun khun kaba don jingma hadien ba laïoh ïa ki jingtip ba la ai da ki ANM
La ïathuh ba mardor ka la kren bad pynsngewthuh ïa katei ka longkmie ba don jingma lai sngi shwa ba kadei ban kha ïa i khunlung bad phah ruh ïa ka ASHA banleit kynduh ïa ka. Katei ka longkmie ka la kha shisngi hadien ka por ba la buh bad ka jaboh ka la sahkut shapoh. Hynrei ki bahaing khlem pynslem ki la pyntip sha ka ASHA kaba leit ban peit mardor ïa ka bad pyntip ruh sha ka CHC bad mardor la phah ïa ka ambulance ban leit shaw na iingsah bad pynkit pat sha Hospital ha ka por kaba biang bad kumta ka la lait im. Kane kadei tang ka nuksa ba kumno kane ka app ka lah ban ïada bad pyllait ïa ka jingim jong ki longkmie, ong u Dr. Sutnga.
Ki jingtip kiba lum lyngba ka MOTHER App, kadei kaba lah ruh ban peit paidbah ha ka dashboard lyngba ka website www.meghealth.in. Kane ka data ka ïarap ruh ban peit bad buddien wat ïa ka koit ka khiah jong ki longkmie armet kaba dei ka dawbah kaba ka jylla mynta ka la duna ki longkmie ba ïap por kha khun.
Kane MOTHER App ka pyni shai kdar sha ka pyrthei ba ka long shisha ka jingkyrkhu ïa ka jylla Meghalaya. Da kane ka sienjam ka sorkar ka la lah ruh ban wanrah bun ki polisi bad pyntreikam ruh ïa ki kum ka Chief Minister Safe Motherhood Scheme kaba dei da ka thong ban pynduna ïa ka jingïap ki longkmie armet (Maternal Mortality Rate) ha ka jylla.
Ïa mynta hi, kane ka app ka ïarap borbah ïa ka sorkar Meghalaya ban pyntreikam ïa katei ka projek kaba kongsantam ka Measurable Outcomes in Transforming Health Sector through a Holistic Approach focusing on Women EmpoweRment (MOTHER).
