Yn tei ka RBTHA ïa ka Traditional Healing Clinic ha Ri Bhoi, rai ban dang pynneh ïa ki kynbat dawai bad ka sumar tynrai

By Mawphor News Desk On Nov 7, 2022

Nongpoh, Naiwieng 06: Ka long ka jingai mynsiem ïa ki nongsumar tynrai ha Ri Bhoi District ha kaba lyngba ka song jingïarap ba la ïarap da ka sorkar jylla, kin sa ioh ban tei noh ïa kawei ka jaka ai jingsumar ha Pahamsyiem, Ri Bhoi ba la tip kum ka ‘Meghalaya Traditional Healing Clinic’.
Kane ka song jingïarap kaba kin sa tei ïa katei ka jaka ai jingsumar tynrai na ka bynta kiba pang ba shitom ka dei kaba la mang da ka sorkar jylla lyngba ka BRDC ha ka jinglut kaba la kot sha ka T. 8 lakh lyngba ka tnad Planning ka sorkar Meghalaya.
Kane ka jingthmu ban tei ïa katei ka jaka ai jingsumar ka la paw pyrthei ruh hynnin ka sngi Saitjain ha ka jingïalang (General Meeting) ki nongsumar tynrai ba la pynlong da ka Ri Bhoi Traditional Healer Association, (RBTHA) ha Pahamsyiem bad la wan shim bynta ruh da ki spah ngut ki nongsumar tynrai na ki 7 tylli ki Sub-Circle na Ri Bhoi.
La wan ruh ban shim bynta ha kane ka jingïalang ki nongsumar tynrai da ka jingdon lang u MLA ka Nongpoh, u Bah Mayral Born Syiem, uba la ai ka jingïaroh ïa kane ka kynhun ki nongsumar tynrai, kiba don ka thong ban pynneh pynsah ïa ka rukom sumar tynrai bad ruh ban pynneh pynsah ïa ki dawai kymbat kiba don hapoh kane ka jylla jongngi.
Nalor ka jingdon lang u President ka Asso ciation, u bah Ïasper D. Manih bad u Secretary, u Bah Elington Syiem la wan shim bynta ruh da ki spah ngut ki nongsumar tynrai bad la don ruh ka jingpynrung thymmai ïa ki dkhot ba kin don lang ha kane ka shatri jong ka Ri Bhoi Traditional Healer Association.
Kumba la ïathuh da u Bah Ïapser Manih, President ka Association, la ong ba kane ka Association ka ju pynlong ruh ïa kane ka jingïakynduh lang man la u snem na ka bynta ban ïa kren halor shibun ki kam kiba dei na ka bynta ka kam sumar tynrai bad ban pynneh ïa ki kymbat dawai. Ka Association ka don ïa ka thong ban pynneh pynsah ïa ka jingsumar tynrai bad ki dawai tynrai kiba don ha ka District bad ha ka jylla, ha kaba kum ka kynhun kam kwah ba kane ka jinghikai da ki longshuwa man shuwa halor ki dawai bad ki rukom sumar tynrai kin duh kin dam noh bad ngin dang trei shitom ban pynneh pynsah na ka bynta ka pateng ban sa wan jong ka jaid bynriew jongngi.
“Ka long ruh ka jingkmen ba ka Association kan ioh lad ban tei noh ïa ka Traditional Healing Clinic’ ha Pahamsyiem bad ka thong ka long ban pynim ïa ka rukom sumar tynrai kiba dei hi da ki kymbat dawai ba la ïalam da ki longshuwa ki man shuwa” ong u Bah Manih.
Shuh shuh, u la bynrap ruh da kaba ong, ba ka Association kan dan trei shitom ban lum ban lang ïa baroh ki nongsumar tynrai ba kin don lang ha kajuh ka shatri bad khamtam ka Association ka pynshlur ruh ban pynim ïa ka rukom sumar tynrai bad ruh ban pynneh pynsah ïa ki kymbat dawai ba ka Association mynta ka la don la ka jong ka jaka ban thung ïa ki kymbat dawai bad ruh ban dang pynneh pynsah ïa ki kymbat dawai kiba don ha ki khlaw ki btap ka jylla, u la bynrap.