Shillong, Nohprah 03: Ka Ïingkashari Meghalaya High Court ha ka sngi baar ka la kyntait ïa ka mukotduma ba kyrpad ban wengnoh ïa ka kyndon ha ka Office Memorandum (OM) ka Sorkar ba pynmih ha ka 5 tarik Lber, 2021, ba ka jingaplai ïa ka Propecting Licence ne Mining Lease ka dei ban long ïa ki jaka ba ym duna ïa ka 100 hectare.
Ha ka hukum ba la pynmih ha ka sngi Nyngkong, ka Ïingkashari kaba khlieh da u Justice HS Thangkhiew ka la ong, “Haba pule ïa ka minute kumba la sot haneng, ka pyni ba watla ka jaka katkum ka SOP la buh ban long 1 sq.km, kata 100 hectare, ka jingtyrwa ban pynduna ïa ka jaka sha ka 50 hectare, lah ieh ban sa shong bishar hadien habud, kumta, kam mut ba ka jingbuh ïa ka 100 hectare ka dei kaba khatduh, bad ka bym shong bishar thymmai shuh da ka Sorkar Jylla”.
“Namar kata, ha ka jingsngew jong kane ka Ïingkashari, ka SOP kaba la pynmih lyngba ka Memorandum ba 05.03.2021, kam shym la don jingduna na u pud u sam lane ka jingbym biang ha kano kano ka rukom, naba ïa kane la leh katkum ka hukum jong ka Ïingkashari Supreme Court ha ka mukotduma ka Jylla Meghalaya pyrshah ïa ka All Dimasa Students Union, ki kyndon jong ka MMDR Act bad Mineral Concession Rules, bad katkum ka jingbthah jong ka Ministry of Coal,” bynrap ia ka Ïingkashari.
Ha ka hukum ka la ong, “Kawei pat ka jingïasaid jong u nongmudui haba ïadei bad ki kyndon ka Meghalaya Mines & Minerals Policy, 2012 lane ka Meghalaya Minor Rules 2016 bad ruh ka Meghalaya Minerals (Prevention of illegal Mining, Transportation and Storage) Rules, 2022, ym shym la kheiñ donkam satia naba kim dei kiba treikam lane don jingïadei bad kane ka mukotduma. Kumta, halor kine ki jingshisha bad ka jinglong ka mukotduma, kumba la ïakren haneng, kane ka writ petition ka dei ka bym don nongrim bad la pynwai noh ïa ka,” ka la bynrap.
