Shillong, Nohprah 03: U Myntri khynnah ka tnat Agriculture & Farmers Welfare ka Sorkar India u Bhagirath Choudhary ha ka sngi baar, ula pyntip ba kam shym la don kano kano ka jingtyrwa ban kyntiew kyrdan ïa ka College of Agriculture ha Jylla Meghalaya sha ka University.
Ïa kane u la pyntip haba jubab ïa ka unstarred question No.1195 ba la wanrah da u MP ka Shillong Ricky AJ Syngkon ha Parliament.
Na ka liang jong u Myntri haba jubab u la pyntip da kaba ong, “Na ka bynta ka Scientific Research bad ban kyrshan ïa ka rep ka riang bad kan kiew ha Jylla Meghalaya, ka Sorkar ka la buh ïa ka ICAR Research Complex for North Eastern Hills (NEH) Region, Umïam, 07 Krishi Vigyan Kendras (KVKs) bad 03 tylli ki Colleges (i) College of Post Graduate Studies in Agricultural Sciences, Barapani (ii) College of Community Science, Tura (iii) College of Agriculture, Kyrdemkulai.”
Ha kaba ïadei bad kane na ka liang u Choudhary ula pyntip ba ki don 3 tylli ki Central Agricultural University, 4 tylli ki Indian Council of Agricultural Research (ICAR) kiba la ibit ban long ki University, bad 4 tylli ki Central University kiba ai jinghikai halor ka kam rep hynrei kam shym la don satia kano kano ka jingtyrwa ban kyntiew kyrdan ïa kine ki college sha ki University kiba pura ha kane ka thaiñ.
Naba ka kam rep kynthup ka jingpule halor ka rep ka riang ka dei ka sobjek jong ka Jylla, ka Sorkar Jylla ka lah ban kyntiew kyrdan lane plie ïa la ka Agricultural University ba thymmai katkum ki jingdonkam ka Jylla na ka bynta ban ai jinghikai halor ka rep ka riang, ka jingwad bniah bad kiwei kiwei, ula ong.
