I Bah Hadrian Lyngdoh, MDC barim jong ka Mawkyrwat constituency i la khlad noh ha ka 3.12.2024. Ka jingleit ontep ia i kan long ha ka 5.12.2024 ha ka por 1:00 baje mynsngi.
I Bah Hadrian i dei i khun jong i Kong Bles Lyngdoh bad Bah Phridolin Syiem. I don lai ngut shi para, i Kong Roselinda Lyngdoh, Bah Hadrian Lyngdoh bad i Kong Rosemary Lyngdoh.
La kha ia i ha ka 11/11/1959 bad ka skul ba nyngkong jong i dei ka RCLP School Rangmaw kata naduh u snem 1968-1973 haduh class 3.
Ki nonghikai ba nyngkong ia i Bah Hadrian Lyngdoh ki dei i Bah Edward Wartde, Kong Trilinda Wanniang bad i Kong Ioana Shangpliang.
Ia ka Class 4 haduh Class 5 i la pyndep na St Paul Marbisu ha ka snem 1974. Bad ia ka Class 6 haduh Class 10 i la pyndep na St Anthony’s School Shillong.
I Bah Hadrian i la pass ia ka Matric ha u snem 1980. Bad ha ka snem 1981 i la pass ia ka PU Science na St Anthony’s School Shillong. I la pyndep pat ia ka Bachelor of Science ha u snem 1984 na St Anthony’s College Shillong.
Ha u snem 1985 haduh 1987 i la hikai ha Nativity School Mawkyrwat. Nangta naduh ka snem 1987 haduh 1990 i la hikai ha Maharam Government School Mawkyrwat.
Ha u snem 1990 haduh 2007 i la trei kum u Sub Inspector ha tnad supply jong ka sorkar jylla bad dei ha u snem 2007 i la resain ban iakhun ia ka election na Mawkyrwat Constituency.
Ha u snem 2014 haduh 2019 i la long kum u MDC jong ka Mawkyrwat Constituency.
Ka jingiathoh pynskhem jong i Bah Hadrian Lyngdoh bad i Kong Daplinshisha Marwein ka long ha ka 31. 12.1993.
