Shillong Nohprah 03: Ka Employment Monitoring Cell jong ka Seng ka la ïoh ban buh dorkhas hakhmat u Bah D.P. Wahlang, IAS, Chief Secretary jong ka jylla Meghalaya ha 2 tarik u Nohprah, 2024 ha kaba ïadei bad ka eksamin kam ba ngat ha kajuh ka sngi.
Ka DSC jong ka Eastern West Khasi Hills District ha ka 31.10.2024 ka la pynbna ban pynlong ïa ka eksamin jong ka Lower Division Assistant (LDA) ha 14 tarik u Nohprah, 2024. Bad hadien kane ka MPSC ha 18.11.2024 ka la pynbna ban pynlong ïa ka eksam LDA ha kajuh ka sngi ha 14 tarik u Nohprah, 2024. Katkum ka notification jong ka MPSC, ïa ka tarik eksamin nyngkong la buh ban long 13 tarik u Nohprah, 2024 hynrei ki la kylliang noh.
Kane ka jinghap jong ki eksamin LDA ha kajuh ka sngi ka la pynbitar bad pyndiaw ruh kumjuh ïa ki samla wad kam jong ka jylla bad bun napdeng kita ki la wan ud sha ka Seng bad kumjuh ruh sha ki bor pynïaid jong ka Sorkar.
Ka jingpynlong ïa ka eksam LDA jong ka DSC bad MPSC ha kajuh ka sngi ka long kumba ïuhroit ïa ka hok jong ki samla kiba thep kam kaba long kum ba pynbor ïa ki ban ïoh thoh tang kawei wat lada ki la apply bad siew ïa baroh 2 tylli bai eksamin.
Ka Seng ka sngewthuh ba ka DSC bad MPSC ka trei kam la ka jong hynrei ki dang dei hapoh ka jingpeit jong ka Sorkar Meghalaya bad da kaba leh kumne ka dang pynsakma shuh ïa ki samla wad kam nalor ba ka kam sorkar ka long kaba duna bad halor kata da pynlait ïa ki kam lyngba ka DSC ne MPSC, kan long kaba sngewsih lada ki nym ïoh ban thoh ïa ka eksamin.
Ka Seng ka kubur ruh ban pynlong ïa ka eksam na bynta ki hajar ngut kam long kaba suk namar hap ban ïoh jaka ha ki skul bad koleij bapher bapher ba ki samla kin thoh eksam, hynrei ki nym lah ban rieh halor kane ka daw namar bun na ki skul bad ki koleij ki la ïoh shuti bad ki lah ban pynlong ïa ka eksam ha kawei pat ka sngi.
Ka Seng ka kyntu ïa ki bor pynïaid ba kin sngap ïa ka jingud jingnam jong ki samla wad kam bad wad ki lad lynti ban pynkynriah noh kawei na kine ki eksamin khnang ba ki samla kin ïoh ban thoh ïa ka eksamin bad ka jingshah jied ka jong ki kan long katkum ka jingleh bha ka jong ki ha ka eksamin. Ka Seng ka maham ruh ba nangne shakhmat kum kine ki jingjia kim dei ban jia biang bad ki bor pynïaid ki dei ban peit bha shuwa ban buh ïa ka tarik eksamin.
