Shillong, Nohprah 03: Ka Meghalaya High Court ha ka sngi baar ka la bthah ïa ka sorkar jylla bad ïa ka National Highways and Infrastructure Development Corporation Limited (NHIDCL) ban thung biang ïa ki 103 tylli ki dieng kiba la shah pynkhyllem ha kaba ïadei bad ka jingshna ïa ka surok national highway kaba dei ka project na Shillong sha Dawki.
Hadien ba la shim ka jingbishar halor ka PIL, ka meij kaba kynthup ïa u Chief Justice IP Mukerji bad u Justice W Diengdoh ka la ong, “Ha kaba ïadei bad kane kaba la kdew haneng, ngi la pynkut noh ïa ka PIL da kaba pynmih ïa ka kaba bthah ïa kiba dei ban jubab ba ki dei ban thung ïa ki dieng kiba la shah pynngat kaba la long katkum ki paragraph ba la kdew haneng hapoh ka affidavit jong ka NHIDCL ba dei ban pyndep ïa kane ka kam.
Ka la ong ba ka jingshna ïa ka surok bah kaba long kaba kongsan bha na ka bynta ka bha ka miat jong ka jylla ka donkam ban pyndep noh kham kloi katba lah kaba dei ruh ban bud ïa ki hukum ba la bthah da ka Court haba ïadei bad kane ka mukotduma kiba dei ruh ban ïaid katkum ki kyndon jong ka aiñ ba dei ban pyndep noh kloi katba lah.
Haba ïaid katkum ki nongrim ba la wanrah lyngba ka PIL, ka Court ka la pynmih ïa kane ka hukum ha ka 7 tarik u Naiwieng, 2024 da kaba ong ba ka NHIDCL bad ka sorkar jylla ba ki dei ban thung noh ïa ki dieng ha kane ka “first package” (part) jong kane ka surokbah.
La ong ba kam shym la don satia ka jingpyntip sha ka Court ha ka por ba la pynngat ïa ki 103 tylli ki dieng da ki bor ba dei khmih.
Ha kane ka sngi, Dr N Mozika, DSGI ba la mihkhmat ïa ka NHIDCL la pyntip sha ka Court lyngba ka affidavit kaba la pynskhem ha ka 2 tarik u Nohprah, 2024 da u client jong u.
Ha ka affidavit la ong: “Ba ka NHIDCL ka donkam 16.107 hectare ka jaka ha shnong Nongumiang, West Khasi Hills district, Meghalaya ha ka jinglut kaba long T. 1,98,43,824/- hadien ba la ïoh ïa kane ka jingmang pisa na ka sorkar jylla kaba 03.02.2021 bad ba ïa kane yn dei ban aiti sha Divisional Forest Officer, Social Forestry and territorial Division, West & South Khasi Hills, Meghalaya ha ka 25.02.2021 lyngba ka Certificate of Handing Possession of Land kaba 25.02.2021 na ka bynta ban pyndep ïa ki kam pom dieng.
La ong ruh ba ka NHIDCL ka la dep ban siew ïa ka pisa kumba T. 3,87,11,297/- sha ka CAMPA Fund (Compulsory Afforestation Management and Planning Authority Fund) lyngba Divisional Forest Officer, East Khasi Hills & Ri Bhoi (T) ha kaba ïadei bad ka Cost of Compulsory Afforestation halor katei ka jaka 16.107 hectare jong ka jaka, na ka bynta ka NPV, na ka bynta ban kyntiew ïa ka pisa kaba dei ban thung dieng kaba la long ha ka 19. 05. 2020 bad 07.08.2020.
Na ka liang Dr Mozika la ong ba kane ka highway ka don haduh san ki jingmang ne ki bynta wat la ki la don ki bynta kiba mad ïa ki jingeh.
