Shillong, Nohprah 03: U Myntri ka tnat pule puthi jong ka sorkar jylla u Rakkam A Sangma u la kyntu ïa ka sorkar lyngba ka Ministry of Education ban pynbeit ïa ki jingeh kiba la mih ha North Eastern Hill University (NEHU) kham kloi katba lah kaba long ruh na ka bynta ka bha ka miat jong ki samla pule.
“Nga kyrpad jur ïa ka sorkar pdeng lyngba ka Ministry of Education, ban pynbeit noh kham kloi ha kaba ïadei bad kane ka kam kaba long ruh na ka bynta ka bha ka miat jong ki samla pule kane ka thaiñ,” ong u Sangma haba kren bad ki lad pathai khubor.
U la ong ba ka kynhun tohkit kaba don ïa ki arngut ki dkhot ka dang hap ban aiti ïa ka kaiphot jong ki ha kaba ïadei bad ka jingjia kaba la jia ha NEHU.
“Kumta kano kano ka rai kaba mih na kane ka kynhun tohkit ka dei ban long na ka bynta ka bha ka miat jong ki samla pule jong ka jylla,” bynrap u Sangma.
Haba ong ba kane ka jingjia ha NEHU ka long kaba ym poi pyrkhat, na ka liang jong u Myntri ka tnat Pule Puthi u la ïathuh ba na ka liang jong u Myntri Rangbah ka jylla u la dep ban ïakren bad ka sorkar pdeng ha kaba ïadei bad kane ka kam bad u la kyntu ruh ïa ka sorkar pdeng ban pyndep noh kham kloi ha kaba ïadei bad kane ka kam.
