Shillong, Nohprah 03: Haba kren pyrshah ïa ka jinglong jingman kaba ïadei bad ka VIP culture, u State President ka All India Trinamool Congress (AITC) bad u MLA ka Nongthymmai u Bah Charles Pyngrope u la ong, “Ka VIP culture kadei kaei? Kidei ki briew kiba dei ki VIP. Ma ngi kum ki riew saiñ pyrthei ngi dei ki shakri jong ki paidbah. Ngim dei kita ki VIP.”
Haba kren sha ki lad pathai khubor u Bah Pyngrope u la kyntu ïa ka sorkar jylla ban khmih biang ha kaba ïadei bad ka jingpynbna ba kum kino ki briew kiba dei ban ïoh ïa ka kane ka lad jingdonkam.
“Kane baroh kadei da ka jingpynbna. Shu buh la shai nga ïoh ïa u personal security officer, hato nga donkam ïa u? Ngam tharai ba kan long kumta. Hynrei ki don ki kyndon ba la buh ba la pyntip ba uno uno u lah ban ïoh ïa kane ka kyrdan kaba donkam. Mynta tang ki pulit kiba lah ban ïathuh la phi donkam ne phim donkam,” u la ong.
U la ong ba kadei ban don aiñ na ka bynta ïa baroh. “Balei ki la pyndonkam ïa ka bad balei kim shym la pyndonkam ïa ka, kane ka shong ha ka sorkar bad ki pulit kiba dei ban ai ki jingïada bad kiwei pat kim donkam satia ban ïoh ïa kiwei pat ki lad jingïada lada u dei u VIP ne ym dei. Lada phim da donkam ban long u politician, phi lah ban dei kiwei pat ne phi lah ban long u nongïalam niam hynrei ym da donkam than ban ïoh ïa ka kyrdan ba long kongsan,” ong u Bah Pyngrope.
