Shillong, Nohprah, 03: Ka kynhun shad Majestic Dance Academy ka la long ka lahduh ban ïohrah ïa ka song pisa kaba 90 hajar lem bad ka trophy ha ka rynsan ïakob shad Step Battle Dance Season-1, Grand Finale ba la pynlong da ka Don Bosco Media Network (DBMN).
Ka kynhun shad Ace Merakis kaba lawan ba-ar ka la ïohrah ïa ka song pisa kaba T. 45 hajar bad ka trophy bad ka kynhun shad Megha Warriors kaba la wan baar ka la ïoh ïa ka song pisa kaba T. 15 hajar bad ka trophi.
Ka Don Bosco Media Network jong ka seng riewniam Salesian of Don Bosco (SDB), Shillong kaba imsngi ban kyntiew ïa ki sap ki phong, ka pule puthi, ka akor ka burom ha ka imlang sahlang ka kine ki khyndiat bnai lyngba ka Don Bosco Youth Centre (DBYC), Laitumkhrah, hapoh ka jingpynïaid jong u Director u Rev Fr. Michael Makri ka la pynlong ïa ka rynsan ïakop shad na ka bynta ki heprit bad ki samla kynthei bad shynrang.
Bun kynhun ki nongshim bynta ki la wan ban pyni ïa la ki sap ki phong ha kine ki taiew ba la lah.
Ka jingïakob shad “Step Battle Dance- Season -I ka la poi sha ka “Grand Finale” ka la long ha ka sngi Baar ha phyllaw jong ka Don Bosco Youth Centre, Laitumkharh ba la sakhi bad ai mynsiem da ki kmie ki kpa, ki bahaiing hasem bad ki nongkyrshan jong kine ki kynhun shad.
Ha kane ka sngi la sakhi lang da u Principal jong ka St. Anthony’s Higher Secondary School, Shillong u Rev Fr. Anthony Kharkongor, uba la long kum u Kongsan.
Ki don hynriew kynhun kiba la poi sha ka jingakhun phainal kiba kynthup ïa ka ACE Merakis, Sana, LSC Duo, Megha Warriors, Phrangsngi bad ka kynhun ki samla lud Majestic Dance Academy. Lai ngut na kine kiba shad marwei bad lai tylli ki jingshad kynhun.
U Director ka Don Bosco Youth Centre u la pynbna ba kan sa don ruh ka ‘Christmas Carol Competition’ ha ka 23 tarik mynta u bnai bad ka ‘Sur Kynud – Season 3 ka ban sdang naduh ka 14 tarik mynta u bnai bad ka ban kut ha ka ka 31 tarik, Kyllalyngkot 2025.
Ka khusnam na ka bynta ka Sur Kynund ka long T. 1,00000 lak bad kiba kwah ban ïashim bynta ki lah ban register online ruh lyngba ka website www.realkasurkynud.com
Kine ki jingïakop kin dei kiba pynïaid da ka Don Bosco Media Network – ka Tv Channel kaba angnud ban kyntiew ïa ka sap ka phong jong ki khun u Hynniewtrep.
