Kynnoh rahbor bad thmu die u Masan ïa ka heprit 8 snem karta, lait phet hadien ba thmu thep ha ka byrni

Nongpoh Jymmang 28: Ha kawei ka jingjia kaba pynpar ñiangkhriat ïa kiba bun ki kmie ki kpa, la kynnoh ba u wei u runar u la rahbor ïa kawei ka heprit kaba dang 8 snem ka rta kaba dang dei ruh shi iing shi sem bad u ha kawei ka shnong kaba hap ha Nongpoh Police Station ha Ri-Bhoi District.
Katkum ka jingtip bala ïoh lum la ong ba kane ka jingjia kala jia haka janmiet jong ka 27 tarik mynta u bnai ha kaba la kynnoh ba utei u runar u la pynshong jubor ïa itei i heprit ha ka bike bad sangeh ha kawei ka jaka kaba la don lypa 3 ngut ki briew lem bad 2 tylli ki bike ba itei ka heprit im lah ban ithuh satia, hynrei i la ïohsngew ba ki kren para maki ban thep haka byrni bad ban die ïa i, bad ynda kitei ki briew kila thmu ban sei ïaka byrni i tei i heprit i la ïoh ban phet na katei ka jaka bad ban pyrta briew bad donbok ba ha katei ka jaka ki don ki nongtrei bylla kiba thep pipe, kila mareh ban leit kylli ha kaba i la ïathuh ba ki don ki briew kiba thmu ban rah jubor ïa i, bad kumta kitei ki nongtrei bylla kila aiti noh sha ka bor shnong bad pyntip sha ki bahaiing hasem jong itei I heprit.
Naka liang ki bahaiing kila ujor ruh daka ejahar ha Nongpoh Women Police Station bad haka jingthwet ki pulit kila ïohkem noh ïa utei u runar bad ka jingtohkit ka dang ïaid shakhmat.