Kynnoh ka HNYF ba ai pata pathar u Syiem Hima Sohra sha ki mynder ri ha Hima Mawlong

By Mawphor Editor On Apr 9, 2025

Shillong, Ïaïong 08: Ka Hynñiewtrep National Youth Front South East Sohra Circle ha ka sngi baar ka la leit ban kynduh ïa u CEM ka KHADC u Shemborlang Rynjah na ka bynta ka bha ka miat jong ka ri bad ka jaitbynriew. Na ka liang ka seng ka pynpaw ka jingsngewkhia ïa ki hima ba don ha khappud bad ka ri Bangladesh, khamtam ka Hima Sohra kaba ïadei bad ka shnong Majai bad ka Hima Mawlong.
Na ka liang ka seng ka la buh ruh ki jingkyrpad hakhmat u CEM ha kaba ïadei bad ka jingjur ka jingwan rung kyrthep jong ki mynder ri ban buhai shnong hapoh Majai khlem da don ka jingtip na ki bor pynïaid shnong ne bor Hima bad ka jingbym don ka khana samari ïa kine ki bar jylla bad ki bar ri kan wanrah bun ka jingeh ïa ka Hima bad ïa ka ophis jong u Syiem bad kumjuh ruh ïa ki trai ri trai muluk hapoh kane ka shnong.
Na ka liang ka seng ka la pynpaw ruh ba ka jingai pathar ïa ki pata jaka hapoh ka shnong Majai na ka liang ka ophis u Syiem Sohra ka pynshlur ïa ki bar jylla bad ka pynshlur ïa kiwei ruh ki mynder ri ban wan buhai shnong khlem da salia shuh ïa ki trai ri kiba don ha kane ka shnong.
“Ngi kyntu ia ka ophis jong u Syiem Hima Sohra ban pynkylla kyrteng noh ïa ki shnong kiba hab hapoh ka thaiñ Majai na ka ktien nongwei sha ka ktien Khasi bad kine ki shnong ki ka Kurikhal, ka Nayabasti, ka Chaklabasti, ka Dhorombasti bad ka Alubari,” pynpaw ka seng HNYF.
Ka pynpaw ruh ïa ka jingpyrshah kaba jur halor ka jingthung Mataphor ne rangbah shnong ha kine ki shnong da ki mynder kum ka Nayabastim, Chaklabasti, Dhorombasti bad Alubari.
“Ha kaba ïadei bad ka Hima Mawlong hadien ka jingkhlad noh jong u Samla Lurshai Hynñiewta ka dorbar Hima ba la pynlong ha u bnai Lber 2020 ka la shim ïa ka rai ban pynkylla kyrteng ïa ki shnong kiba don ha khappud da ka kyrteng ba la buh da ki longshwa manshwa ha ka Hima, kum ka Ichamati, Rangamati, ka Dhorom, Tallab, Khuti, Lubia, Kalibari bad Beltolo hynrei u Sordar Mawlong dang shong kli kti haduh kine ki sngi ba la dap ruh 5 snem mynta,” ïathuh ka Seng.
Ka seng ka la ïathuh ruh ba ka jingbym lum ïa ka khana samari ïa ki mynder ri kiba don hapoh ka Hima Mawlong kaba la ïaid la bun tylli ki snem ka wanrah jingma ïa ki trai ri trai muluk bad ïa ka pateng ban wan, kumta kum ka seng ka dawa jur ïa ka KHADC ban mana ïa u Sordar ban thung rangbah shnong da ki mynder ri hapoh ki shnong kiba don hapoh khappud khamtam kiba hap hapoh ka Hima Mawlong kum ka nuksa ka Diengrai, Khaumrin Umphlo, Nongasl, Bettuli, Lubia bad Kalbari.
“Ka jingpynlong ïew beaiñ ki bar jylla ha Kalibari ka long kum ka jingpynkheiñ ïa ki riti dustur ka Hima namar ka la don lypa ka ïew Hima hapoh Pynthaumdan (Ichamati) kumta ka seng ka dawa jur bad dei ban khang noh mardor da ka bor ba dei peit jong ka Council ïa kane ka ïew beaiñ, bad kyntang ïawai ka seng ka pynpaw ka jingkyrmen kaba skhem ba hapoh ka jingïalam jong phi kum u CEM bad ka EC hi baroh kawei ba phin shim khia ïa ki mat ki jura kaba ngi la buh hapoh kane ka dorkhas ban pynlong kam ïa ki,” bynrap ka HNYF.