Kynnoh ka HITO ba trei hi ki ophisar bad nongtrei ïa ki projek ka Soil & Water Conservation
Shillong, Lber, 7: Ka Hynñiewtrep Integrated Territorial Organisation (HITO) ha ka sngi Palei ka la pan jingpynshai na u Myntri ka Sorkar Jylla uba khmih ïa ka tnat Soil and Water Conservation u Macruise N. Marak halor ka jingïoh ujor jong ka seng ba ki ophisar bad ki nongtrei ka tnat Soil and Water Conservation ki pyntrei hi ïa ki projek ne ki skhim bapher bapher jong ka Sorkar Pdeng bad ka Sorkar Jylla kum ka IWMP, ka AIBP, RKVY bad ka Nabard Loan.
U President ka HITO Bah Donbok Dkhar ha ka jingïakren bad ki lad pathai khubor u la ong ba lyngba ki projek bad ki skhim kane ka tnat ka ju shna ïa ki Dam, ki nala ring um, ki kynroh, ki jingkieng ba long ban ïaid kjat bad ki jaka pynlang um, ki pung um bad kiwei kiwei.
U ong ba la lap ba ïa kine ki kam la pyntrei hi da ki Ophisar bad ki nongtrei jong kane hi ka tnat treikam khlem da khot Tender ban ai ïa ki jingtrei sha ki Contractor ne ki Supplier kumba la leh da kiwei kiwei ki tnat treikam jong ka Sorkar.
“Ngi la ïoh pdiang bun tylli ki jingkyrpad na ki samla kiba la nang la stad ki bym donkam donkam kiba shu trei malu mala ïa ki kam Kontraktor halor ka jingpyntrei hi da ki ophisar bad ki nongtrei ka tnat Soil and Conservation,” ula ong bad bynrap, “kumno ka Sorkar ka shah ïa ka tnat Soil and Conservation ban aikam ïa la ki jong ki ophisar bad ki nongtrei watla kam don ka Engineering Wing ha ka tnat kynthup ka jingsuplai ïa ki mar bad leh kiar na ki Registered Contractors ne Supplier bad na ki nongtrei ba la tbit kumba la leh ha kiwei kiwei ki tnat treikam ka Sorkar.”
“Ngi sngewthuh ba ki ophisar bad ki nongtrei jong ka tnat Soil and Water Conservation ki don bynta ban suplai bad ban jied nongtrei bylla ha la ka mon khlem da khot Tender ha ka rukom kaba dei khnang ban ailad ïa ki samla kiba la nang la stad ki bym donkam donjam. La pyntip ruh sha ngi ba bun na ki nongbylla la wanrah ruh na shabar ki shnong ba la pyntrei ïa ka projek ha kaba la pynduhlad ïa ki nongtrei kiba la tbit jong ka thaiñ kaba long kum ka jingpynduh ïa ka kamai jakpoh,” la ong une u nongïalam ka HITO.