Dei ban pynlong beit man la u snem ïa ka tamasa Monolith : Kyntu u Dy.CM ïa KHADC
Phuh ka sngi sdang jong ka Monolith Festival
Shillong, Lber 7 : Ka Monolith Festival kaba lai sngi ka la sdang mynta ka sngi Palei bad ka la long kaba shongkun bad phuh phieng bha da ka jingwan shim bynta shitrhem jong baroh ki Hima kiba hap ha u pud u sam jong ka Council.
ïa kane ka tamasa la wan ban plie da u Symbud Myntri Rangbah ka Jylla ba dei peit ïa ka tnad District Council Affairs,u Bah Prestone Tynsong.
La pynphuh shuh shuh ïa kane ka tamasa da ki jingpyni ïa ka shad tynrai, ki jingrwai bad ruh ka phawar kaba la pynshongshit bha ha kane ka sngi sdang.
U Kongsan ha ka jingkren u la kyntu ïa ka KHADC ba kan ïai bteng ban pynlong ïa kane ka tamasa man u snem nangne shakhmat.
U Bah Prestone u ong ruh ba bun ki kwah ban ïohi ïa kane ka tamasa naba ka long ka lympung ba ki paidbah ki lah ban ïohi ïa ka tynrai, ka kolshor bad khamtam ïa ki riti distur jong ki Hima bapher bapher kiba don ha u pud u sam jong ka Council.
Na ka liang u CEM ka KHADC, Bah Pyniaid Sing Syiem ha ka jingkren u la ong ba lyngba ka tamasa Mawbynna ka pyni ïa ka kolshor, ka kup ka sem, ka shad ka mastieh, ka lehniam leh rukom, ka Ktien ka thylliej bad kiwei kiwei ki jingriewspah ba kum ka Jaidbybriew Khasi ka don ban pyni sha ka pyrthei.
U CEM u la ai ruh ka jingïaroh ïa ki Hima, ki shnong bad baroh kiba la donkti ban pynphuh pynphieng ïa katei ka tamasa.
“Lada shim tang naduh ka jingwan ki mishoneri ka Jaidbybriew jong ngi ka la don kumba 200 snem. Kumta ha kine ki snem ngi sngew dei ban ai burom ïa ki longshwa kiba la lah ban pynrung ha ka Khyrnit kaba Hynriew jong ka Riti Synshar jong ka Ri ban ïada ïa ka jinglong kyrpang jongngi.”
Ha ka Sixth Schedule la aibor ïangi ban pynneh pynsah ïa ka aijait sha ka Kmie. “Ngim kwah ba kiwei ki ar kin ïalam bakla da kaba ai jait sha kiwei ki ar,” u la bynrap biang.
La pynphuh ïa ka tamasa da ka Shad Thma na Hima Mawphlang, ka Shad Sajer na Raid Khadar Nonglyngdoh, Ri Bhoi, nalor ki jingrwai bad ka Phawar.
Ha kane ka sngi jan baroh ki MDC kumjuh ki Khlieh Nongsynshar ki la wan ryngkat ka spong bad ki riam tynrai ban pynïahap bad katei ka tamasa.
Ha ka por janmiet u Kongsan ryngkat u CEM ki la leit ruh ban peit ïa ki Ïing trep jong ki Hima bapher bapher.