Pan jingshai ki MDC TMC ïa ka jingpan pisa ka JHADC na ka 15th Finance Commission

Jowai, Lber 07: Ka Dorbar mang tyngka jong ka Jaiñtia Hills Autonomous District Council (JHADC) Jowai kaba la long mynta ka sngi 7 tarik u Lber, 2024 kala long kaba ïaid beit ïaid ryntih, ïa ka Dorbar la pynïaid da u Chairman ka JHADC Dr. Sankey Shangpung bad ïa kane ka Dorbar yn pynkut lashai ka sngi 8 tarik Lber 2024.
Ki MDC ka Liang Pyrshah ba kynthup ïa u ma A.A. Shullai u la pan jingpynshai na ka Executive Committee ha kaba ïadei bad ka jingmang pisa ïa ka JHADC na ka 15th Finance Commission hapoh ka Tied Grant bad United Grant jong ka Financial Year 2023-24, na ka liang u EM I/c ma P. Dkhar ula jubab ba kam don.
U ma A.A. Shullai ula kyntu ïa ka EC ba ka dei ban bud dien ïa kane khnang ba ka sorkar na Delhi kan shimkhia ban pynlait ïa ki skim jong ka 15th Finance Commission. Shuh shuh ula pan jubab ïa ka 5th Finance Commission 2023-24 la dep ban submit lyngba ka Egram Swaraj portal jong ka sorkar kmie, la jubab ym pat dep hynrei ka dang uploaded haka e-Portal.
Ha kaba ïadei bad ka jingthmu ban bhah ïa ki Constituencies hapoh ha District Council u ma A.A. Shullai ula pan jingshai kaei ka jingthmu ban thaw ïa ka District Council Constituency jong ka JHADC bad ïa ka Delimitation Committee. La jubab da u CEM ka jingthaw ïa kane ka District Council Constituencies la thaw khnang ba kan peit bniah ïa ka jingdon jong ki nongthep vote hapdeng ki Constituencies. Katba ka Delimitation Committee kan eksamin ïa ki Constituency katkum ka order bala bthah da u Lat ka jylla ba donburom ïa ka District Council.
Na ka liang u ma Andrew ula pynpaw ka jingsngewsih halor ka jinglait paitbah (leaking) jong kane ka jingthmu jong ka Council ban bhah ïa ki Constituencies.
Katba na ka liang u ma Brightstar Chyrmang ula buh jingkylli halor ka jingdon jong ka Check Station ka Council ha shnong Khliehtyrshi ban jurip ïa ka jingkit mar beaiñ na ki bar jylla, la jubab da u ma W.G Sungoh haoid ka don ka Check Station ha katei ka jaka bad ïa katei ka Check la pynïaid da ka tnad jong ka Council da kaba ai bor ïa ki nongtrei ka Council ban pynïaid ryngkat ki nongtrei kiba dei ki trai shnong bad ki trai jaka.
Ha kaba ïadei bad ka jingkylli halor ka NOC sha ki Coke Factory ha East Jaiñtia Hills District naduh ka 1 tarik u April, 2023 haduh 29 tarik u February, 2024 bala kylli da u Brighstar Chyrmang la jubab da u ma T. Shiwat CEM ba kam shem la issue wat tang kawei ruh.
U ma B. Chyrmang ha ka jingkylli halor ka jingshah transfer jong ki nonghikai DCLP kiba hikai ha ki Govt. LP School sha ka Council DCLP School, la jubab da u L. Dkhar EM haoid, da kaba pynsngew ruh haduh mynta ki khynnah DCLP ki don 4317 ngut, ki nonghikai 200 ngut bad ki skul ki don 95 tylli..
Ha kane ka Dorbar mang tyngka la pynkiew kyrdan ruh ïa ka kong Christabelmorn Bthuh Junior Engineer- sha ka kam Assistant Engineer ha ka Civil Work Department JHADC, Jowai.
Lashai ka sngi 8 tarik ka Council ka dorbar kan ïatia ïa ka mang tyngka na ka bynta u snem 2024-25 halor ka jingïoh bad jingpynlut jong ka JHADC.