Khliehriat Risaw 21:Ka seng jong ki nongkhaiï kaba na East Jaiñtia Hills District, kaba la tip kum ka East Jaiñtia Mineral Supplier Exporter Importer Association (EJMSEIA) kaba hapoh ka jingïalam u President, u bah Wanshwa Nongtdu myn ha ka 20 tarik mynta u bnai u la leit ban bud da ka jingthoh hakhmat u Secretary jong ka tnat Khlaw, ka Forest Department bad kyntu ïa utei u heh sorkar ban wanrah noh ïa ka tnat District Forest Office ha East Jaiñtia Hills District khnang ba kan kham pynsuk ïa ki paidbah kiba don ki kam kiba hap ban iatreilang bad katei ka tnat.
Kat kum ka jingong u bah Wanshwa Nongtdu, u la ong ba ha ka jingïakynduh bad utei u heh jong ka tnat Khlaw (Forest), u Dr Manjunatha bad ruh ha ka jingkynduh bad u myntri sorkar u bah Kyrmen Shylla, la ong ba ka long kaba sngew don jingmyrmen ba ka East Jaintia Hills District kan ïoh noh la ka jong ka tnat District Forest Office kaba pura hapoh ka district, ha kaba utei u heh jong ka tnat Forest u la kular ba un shim khia ban pynurlong ïa kane ka jingkwah ka EJMSEIA bad bynrap ruh ba ka East Jaiñtia Hills District ka la biang pura bha ban ioh ïa ka ophis District Forest Office (DFO), kumjuh ruh na ka liang u bah Kyrmen Shylla u la kular ba un sa bud dien ïa kane ka jingkwah ka Association khnang ba kan pynsuk ïa ki paidbah jong ka district ha kaba leit ban buh ïa ki kot ba donkam kata ban apply ne ban pynpoi ïa ki kot donkam ha kaba ïadei bad ki kam khaïi pateng kum ki Minor Mining, ki Cursher, kiba kwah buh Petrol Pump kiba donkam ban ïoh ïa ki syrnot (Forest Clearance Certificate) na ka tnat khlaw (Forest Department), ha kajuh ka por utei u nongïalam, u bah Wanshwa Nongtdu u kyrmen shkem ba kane ka sorkar MDA ruh kan shim khia ïa kane ka kam.
Katkum ka shithi ba la buh ha khmat u Secretary Forest Department Meghalaya, ba la soi da u Presiden ka EJMSEIA, ka Association ka la pynpaw ïa ka jingkwan ban don noh la ka jong ka ophis DFO ha East Jaiñtia Hills District ha kaba kan kham pynsuk ruh ïa ki paidbah nongkhaiï haba ki donkam ïa ka Form-H sha ki Mining Lease Holder ha kaba kin nym donkam shuh ban leit shaduh Jowai, West Jaiñtia Hills District lada ki don kino kino ki kam kiab ïadei bad ka tnat Forest.
La pynpaw ruh ba ki 21 tylli ki Mining Lease Holder ki lah ban pynmih haduh T5,77,50,00.00 ha ka shi bnai bad kane kan ïarap ban kyntiew ïa ka khajna jong ka distrcit bad ka sorkar.
Kumjuh ruh la pynpaw ne pynshai ba lada kitei ki 21 tylli ki Mining Lease Holder jong ki nongkhaiï kin shim 5 tylli ki Book jong ka Form-H kiba don 100 copy ki challan ha kawei ka Book bad ka dor jong ka challan kan long T5500 tyngka bad ka khajna sha ka sorkar kan long T 5,77,50,000 tyngka shi bnai bad kan poi haduh T69,30,00,000 tyngka shi snem.
U bah Nongtdu u la ong ruh ba ka jingdon ka ophis DFO hapoh ka district kan ïarap ruh ban kyntiew shuh shuh ïa ka kam khaïi pateng ka ban ïarap ruh ban kyntiew ïa ka ïoh ka kot jong ki paidbah.
