Da skhim pynroi ha ki shnong khappud, aiti u MLA ka Nongpoh ïa ki song pynroi sha ki 6 tylli ki shnong khappud ha ka thaiñ Marwmaiñ

Nongpoh, Risaw 21: Ka long shisha ka jingkyrkhu kaba khraw na ka bynta ki nongshong shnong jong ka Nongpoh Constituency kiba hap ha ki thaiñ Khappud ka Meghalaya bad ka Assam, namar mynta ka sngi ki
6 tylli ki shnong ki la ioh ban pdiang ïaki ki kam pynroi bala pynlait piadbah duh 6 tylli ki work-order na ka bynta ban sdang ban pyntrei ïa ki kam pynroi bapher bapher, ïa kaba la mang lyngba ka skhim ba la tip kum ka Inter State Border Area Development Program (ISBADP) na ka sorkar Meghalaya.
Kine ki kam pynroi ki la wan poi sha kitei ki 6 tylli ki shnong ha ka thaiñ Khappud ha ka thain Marmain- Khulia ka dei hadien ba u MLA ka Nongpoh lyngba katei ka skhim u la pynlait paidbah ïa ka song pisa kaba T. 8 na ka bynta ki 6 tylli ki shnong ha ka jingïalang kaba la long mynta ka sngi ha ka Shnong Khulia, Ri Bhoi District.
Kitei ki shnong ba la ioh pdiang ïa kitei ki kam pynroi ki kynthup ïa ka Shnong Umjong ban shna ïa ka jaka thaiñ Jaiñ, ka shnong Ampriling ban shna ïa ka surok ïaid kjat, ka shnong Morkang ban shna ïa ka surok ïaid kjat, ka shnong Khulia ban shna ïa ka surok ba lah ban ïaid kali bad ka shnoing Khuswai bad ka shnong Rongbata ban shna ïa ka surok ïaid jkat ki paidbah.
La sakhi lang ruh ha kane ka sngi ba la sam ïa kitei ki kam pynroi kaba la kot sha ka mang tyngka kaba T. 8 lak da ka jingdon lang ki rangbah shnong,ki nongïalam shnong bad kynthup ki paidbah nongshong shnong katei ka thaiñ Marmain bad Khulia ha Ri Bhoi District.
Haba kren bad uwei na ki Rangbah Shnong jong kitei ki shnong, u la pynpaw ba kane ka long ka sngi ka ban sa jingkynmaw namar ka long ka sien kaba nyngkong eh ban ioh pdiang Ïa kane ka skim kaba la pynmang kyrpang eh na ka bynta ki nongshong shnong ha ki khappud. U la ai khublei ruh Ïa u MLA ba u la shimkhia ban phai khmat lem sha ki khappud da kaba wan rah ïa kine ki skhim.
U Bah Mayralborn Syiem, MLA ka Nongpoh u la ong, ba kane ka long ka sien kaba nyngkong eh bad kadei ruh ka jingsdang na ka bynta ban pynpoi ïaki kam pynroi ha kine ki thaiñ khappud. u la ong ruh ba kane ka long ka wat kaba nyngkong ha kaba u la lah ban pynrung tang 6 tylli ki shnong napdeng ki baroh ki shnong ha ki thaiñ khappud bad na ka bynta ban wan ki kam pynroi ha ki shnong khappud un dang trei shitom ban wan rah ïa shibun ki kam pynroi ban myntoi ki paidbah nongshong shnong ha ki thaiñ khpapud ba hap ha ka Constituency jong u.