Jowai, Risaw 21: Mynta ka sngi ka tnad pulit jong ka West Jaiñtia Hills District Executive Force, ka la pynlong ïa ka jingleh burom ïa ka “Police Commemoration Day”, ne ka jingkynmaw burom ïa ki pulit ka ri kiba duh ïa la ka jingim ha ka por ba ki dang don hapdeng ka kam.
Ïa kane ka jinglehburom la pynlong ha Jowai Police Reserve, Administration Building, Jowai, la don ruh ka jingbuh syntiew ba la shim bynta da u Superintendent of Police ka District u Bikram D Marak, kynthup ïa u B. Chettri, MPS Addl. Superintendent of Police, ka kong C. W. Lyngdoh, MPS Deputy Superintendent of Police (Crime), ha ryngkat ka jingdon lang ki ophisar pulit bad kiwei de.
Na ka liang u Superintendent of Police ka WJHD u Bikram Marak ula pynsngew ki la don haduh 264 ngut ki pulit ka Ri kiba la khlad hapdeng jong ka kam kiba don ha kylleng jong ka Ri India ïa kiba la shim jingkhieñ naduh 31 tarik u Nailur 2021 haduh ka 1 tarik Risaw 2022. ha ka juh ka por ula pule ruh ïa baroh kitei ki kyrteng kum ka jingkynmaw burom ïa ki.
Shuh shuh la pynkynmaw ba ïa kane ka sngi la ju rakhe ïa ka ha manla u snem kum ka dak ban kynmaw burom ïa ki para pulit kiba don shisha ïa ka mynsiem ban ka jinglen ïalade na ka bynta ka kam ba la bynshet ha ki, kat haduh ba ki la kloi wat ban aiti ïa la ka jong ka jingim na ka bynta ka Ri ban ïakhun ïa ki nongshun.
