Shillong, Kyllalyngkot 30 : Ka jingïaid lynti jong ka Meghalaya ha ka lympung ïalehkai kriket ki kynthei ka Senior Women’s One Day Trophy ka la poi noh sha kaba kut hadien ba ka la mad nam rem ha ka jingïalehkai ba khatduh jong ki da hynñiew wicket ha ka Punjab ha ka jingïalehkai ha ka sngi U Blei ha Nagpur.
Ha katei ka jingïalehkai, ha ka jingshisha ka Meghalaya ka la lah ban ïalehkai bha hynrei ka kham duna tang ha ka liang ka jingkamai ron.
Haba phai sha ka jingïalehkai, ka Punjab kaba la jop ïa ka jingkynting pisa ka la ailad ïa ka Meghalaya ban tied nyngkong ha kaba ka la lah ban teh lakam ïa ka jingkamai ron tang da 106 ron duh noh 9 wicket ha baroh ki 50 over. Dei tang ka Sejal Raut kaba dei ka Guest player kaba ïoh ban kamai bun ron ha kane ka tournament da 209 ron) kaba la khyrwit ïa ka shiteng spah ron kaba ar shwa ba kan khyllem wicket da kaba kynjoh thik ïa ka 50 ron.
Ka Vaincy Chaudhary ka kamai 14 ron bad ka Ankita Sharma 11 ron kiba kynjoh sha ka shiphew ron tam na ka bynta ka Meghalaya.
Haba beh ïa katei ka thong, ka Punjab ka la duh wicket noh lai wicket ha ka 18 bad 19 over hynrei ka dang lah pat ban kynjoh sha ka thong bad pyndep ha ki 26.3 over.
Ka Riticia Nongbet ka pynkut da kaba ïoh 1 wicket ai kamai 18 ron, ka Debasmita Dutta 1 wicket ai kamai 28 ron bad ka Sharma 1 wicket ai kamai 32 ron. Ka Ajima Sangma ka pyndep ha ka kyrdan ba 50 jong ki thei kawang bol da kaba khur khyndai wicket, katba ka Dutta ka don ha ka thup ki 100 ngut da kaba khur hynñiew wicket.
