Kut noh ka 9th Meghalaya State Level Jeet Kune-Do Championship 2024, lahduh ka East Khasi Hill

SHILLONG, Risaw 14: Ka Meghalaya Jeet Kune-Do Association [MJKA] ka la ïoh ban pynlong ïa ka ‘9th Meghalaya State Level Jeet Kune-Do Championship 2024’ kaba seisoh ha MSMA Hq – Laitkor Kynton-U-Mon, Shillong. Kane ka lympung ka la bteng ar sngi lynter naduh ka 11 tarik haduh 12 tarik mynta u Risaw, 2024.
Lah ban kdew ba ka MJKA, la seng ïa ka naduh u snem 2012 ryngkat ka Registration No-58/16 jong u snem 2016 kaba la pynïasoh bad ka JEET KUNE-Do Martial Arts Federation jong ka ri India (New Delhi) ka dkhot jong ka Asian Jeet Kune-Do Federation (Sri Lanka), International Jeet Kune-Do Federation (Uzbekistan), World Jeet Kune-Do Federation (USA).
Ka jingpynlong jong ka MJKA ïa kane ka rynsan ïalehkai kaba la tip da ka ‘9th Meghalaya Jeet Kune-Do Championship 2024’ ka long shi bynta ban jied ïa ka kynhun ban mihkhmat ïa ka jylla sha ka ‘10th National Jeet Kune-Do Championship’ ban sa long hangne ha Shillong ha u Nohprah, 2024.
Ki la don kumba 80 ngut ki nongïashimbynta ha kane ka championship. Namar ba la jan ka Final Exam jong kiba bun ki khynnah la wan ïashimbynta tang 3 tylli ki kynhun ha kane ka jingïakob. Ïa ka Team Champion Trophy la khur da ka kynhun Jeet Kune-Do jong ka East Khasi Hills bud sa ka East Jaiñtia Hills District ha ka kyrdan ba ar.
Kiba la khur takma ha ka Sub Junior jong ki kynthei ki long: Ka Esaka Warjri (ksiar ha ka kyrdan 20kg bad 28 kg), Euginia K Thabah (rupa 20kg), ïarika Mawrie (rupa ha ka 20kg), Prila Myrboh (ksiar ha ka 32kg), Baiarihun Myrboh (ksiar ha ka 36kg) bad ka Alfinia (rupa ha ka 36kg).
Ha ka kyrdan Junior (Kynthei): Sesilia Dkhar (ksiar), Wansamaka (rupa) bad ka Riwa Kyndait (rnong) ha ka thup jingkhia 45 kg. Rijanai Ryndong (ksiar), Jyntialin Warbah (rupa) bad ka Takecare Phawa (rnong) ki la jp ha ka 52 kg.
Ha ka Sun Junior (Shynrang): Nangshanborlang Nongspung (ksiar), Wanbiang Warjri (rupa) ha ka thup ïakop 15kg. Fullshai Myrboh, Ebhamiki Warjri bad u Banbiang Nongspung ki la jop ha ka 20 kg. Steven Thabah bad u Eric Rymbai ki la jop ha ka 40kg.
Ha ka Junior (Shynrang): Pynïohnam Myrboh bad u Jefferson Ryndong ki la jop ha ka kyrdan 45kg. Salmi Phawa bad u Luckystar Kharmudai ki la jop ha ka 50kg. Jeosaia Hynñiewta, Bankerlang Myrthong, Evansius Sohtun bad u Winningstar Marbaniang ki la jop ha ka 55kg.
Ha ka Semior (Kynthei): Kongka Dkhar bad ka Macdalyne L Marshillong ki la wan ba nyngkong bad ba ar ha ka thup 55kg. Ka Sany Khyiemmujat ka la jop ha ka 60kg.
Ha ka Semior (Shynrang): Pyndaplang Marak bad u Terensius Khylliat ki la jop ha ka 50kg. U Banteibok Songthiang, Pyrshangbanjop Kharmudai bad u Joply Sana ki la jop ha ka 55kg. U Ewansama Gashna bad u Wanpherbha Kharkongor ki la jop ha ka 60kg.