Kut jingmut ka sorkar ban pyndep ïa ka jingpynbeit pud bad jingkren ïasuk bad ka HNLC

Shillong Lber 20 : U Lat ka Jylla Phagu Chauhan mynta ka Lah Sngi U Blei, ula ong ba ka jinglong jingman ka suk ka saiñ ha Jylla ka la shongsuk bad u ïaiban ba ka Sorkar kala kut jingmut ban pyndep noh ïa ka jingpynbeit ïa ka jingïakajia pud bad ka Assam kata sa ha ki 6 tylli ki jaka ba dang sah bad ka Assam bad kmjuh ruh ban pyndep ïa ka jingkren ïasuk bad ka seng HNLC.
Haba ai jingkren ha ka sngi sdang jong ka Dorbar Mang tyngka, u Chauhan ula ong ba ka jingshngaiñ jong ki Nongshong shnong, ka jingsuk bad ka jingai jingïada ka long kaba kongsan bha na ka bynta ka roi ka par jong ka Jylla.
Ula pyntip ba ka sorkar Jylla ka la thung ïa ka Judicial Commission ban tohkit halor ka jingjia ha Mukroh bad ka la kut jingmut ban pynthikna ïa ka jingbishar ba hok ïa ki lanot bad ka ïing ka sem jong ki.
“Ban pynthikna ïa ka jingïada ïa la ki jong ki nongshong shnong ha ki shnong khappud, ka Sorkar kala pynbna (notify) haduh hynniew tylli ki border outpost” ula ong.
U Lat ula kdew ruh ïa ka rai jong ka Hynniewtrep National Liberation Council (HNLC) ban ïakren khlem the kyndon hapoh u pud u sam jong ka Riti Synshar ka Ri.
Haba pynpaw ba ka jingïakren ïasuk ka la sdang, ula ong “Ka Sorkar Jylla ka la kut jingmut ban pynthikna ba ka jingïakren kan poi sha kaba kut kham kloi kat kaba lah. Ngi pynpaw ka jingsngewnguh ruh ïa ka Sorkar India halor ka jingai jingkyrshan ïa kane ka jingkren ïasuk”.
U Chauhan ula ong ruh ba kawei na ki matti ba paw jong kane ka Sorkar ka long halor ka sienjam ba ka la shim ban pynbeit noh shirta ia ka jingïakajia pud hapdeng ka Meghalaya bad ka Assam.
Hadien bun ki jingïalang, baroh artylli ki Jylla ki la shim ban ïakren pynbeit shuwa ïa hynriew tylli na ki 12 tylli ki jaka ba ïakajia kata ka Tarabari, Gizang, Hahim, Boklapara, Khanapara-Pillangkata bad Ratacherra.
Ki Regional Committee ba la khlieh da ki Myntri Sorkar na baroh artylli ki Jylla, kila leit ban jurip sha kine ki jaka kajia, pynlong ïa ki jingialang paidbah bad ïasyllok bad ki kynhun bapher bapher na ka bynta kine ki hynriew tylli ki jaka.
Da kaba pynshong nongrim ïa ki kaiphod jong baroh lai tylli ki Regional Committee, ka Sorkar Meghalaya bad ka Assam ki la ïasoi ïa ka MoU ha ka jingïadon ryngkat u Myntri kam Pohiing ka Ri u Amit Shah.
“Nga da sngewkmen eh ban pyntip ha kane ka ïingdorbar ba ka Sorkar Jylla kala kut jingmut ban pynbeit noh sa ïa ki hynriew tylli ki jaka ïakajia ba dang sah. Kane ka long kaba kongsan ban pynthikna ba ki nongshongshnong ha ki jaka khappud kin nym shah khanglad ban ïoh ïa ka jingsuk bad ka roi ka par” ula ong.
Nalor ban pynneh ïa ka shongsuk shongsaiñ, u Lat ula ong ba ka Tnad Meghalaya Police ka la pynleit jingmut bha halor ka jingpynjanai ïa ka rukom tohkit ïa ki jingjia baroh.
“Kane ka la lam sha ka jingkiew ka jingshah pynngat kyndon haduh 39.76% ha u snem 2022 haba ïanujor ïa ka 32.2% ha u snem 2021” ula ong.
Haba pynpaw ruh ba ka Tnad Pulit ka la ïakhun tyngeh pyrshah ïa u droks, u Lat ula ong ba ka jingïoh kurup drok ka la kiew bha ha u 2022 kaba kot haduh T. 71 klur lem bad ka pisa ba kot T. 60 lak.
Ula ong ba ka Sorkar Jylla ka la kut jingmut ban pynkhlaiñ shuh shuh ïa ka Tnad Pulit bad ban pynbiang ïa ki jingdonkam jong kane ka tnad.
Ha ki snem bala leit noh, ka Sorkar Jylla ka la pynkha haduh 5 tylli ki Fire & Emergency Service Station, 9 tylli ki Police Outpost bad 5 tylli ki Polit Station ba thymmai.