Ai kin khlong shuwa ïa u klongsnam jong ngi shuwa ba kin khlong uranium: Lambokstar

Shillong, Lber 20: U President ka Khasi Students’ Union (KSU) u Bah Lambokstarwell Marngar haba kren ha ka jingpynlait paidbah ïa ka 1978 KSU Shirta ka Documentary Film jong ka KSU ha U Soso Tham Auditorium u la ong ba kumba ka KSU ka pyrshah ïa ka jingthmu ka sorkar ban khlong ïa u Uranium kan ïai pyrshah mynta ruh bad kumjuh ïa ka lynti rel kaba ka sorkar ka ïai don ka jingpyrshang ba man ka por ban wanrah wat la ka don ka jingpyrshah na ki kynhun kiba pher bapher.
“Lada ka sorkar ka thmu ban khlong ïa u uranium na ka ri jong ngi kane ka long ka kyrwoh kaba shai ba to khlong shuwa ïa u klong snam jong ngi ki dkhot ka jaidbynriew bad lada phi thmu ban wanrah lynti rel khlem pat wanrah ki ai ïada ïa ngi to pynkhreh lupa ba ki jingjia ba kham shyrkei ban ïa u 2017 kan jia bad kane ka dei ka rai kaba skhem,” u la ong.
“Ngi la dawa ïa ka ILP naduh ki snem kiba la kham mynshuwa, ngi la dawa ba ka ktien Khasikan rung ha ka khyrnit ba phra hynrei kine ki mat ki dang sahteng bad ka jingkylli kaba ngi hap ban kylli ka long ïa kine ki nongsynshar jong ngi,” u la ong
U la ong ruh ba ka jingïapait ïa pra ka jaidbynriew ka dei ka jingtlot kaba kum ka jaidbynriew ngim pat weng haduh kine ki sngi kiba mynta.
“La ong ba ngi dei ka jaidbynriew kaba rit paid hynrei nalor ba ngi rit paid ngi long ruh ka jaidbynriew kaba ïapait ïapra,” kren sngew bynñiaw u Bah Lambok.
Haba kren halor ka jingmih ki jingkynthoh ba ka KSU ka jah khlem kren eiei ha shuwa ban wan ka elekshon u bah Lambok u la ong, “Ka KSU kam ju mih shisien san snem hynrei man la ka sngi ka trei ïa la ka kam bad haba dawa ka kam ba ngin long liang pyrshah ngi shim ïa ka lyngkor, haba dawa ka kam ban long maw jynthud ïa ka sorkar ngi mih sha khmat.”
“Kum u President ka KSU nga kwah ban ai khublei ïa ki nos ki doktor kiba la ñiad ïa ka snam jong ki dkhot ka KSU naduh ki snem kiba la leit haduh mynta haba mih kano kano ka jingjia shah pynmihsnam jong ki dkhot jong ngi,” u la ong.
Haba ai jingkren ha kane ka sngi u Bah G Basan u General Secretary kaba nyngkong eh ka KSU u la ong ba ka jingmih ka KSU ha u snem 1978 ka dei ban ïeng ïakhun na bynta ka bit ka biang ki samla pule Khasi ha kito ki por bad ong ba ka jingmih ka dei ruh kaba la da pyrkhat sani da ki samla kiba don ïa ka jingsngewkhia ïa ka jingshah thombor ki samla ka Khasi bad ka jingshah knieh ka hok jong ki ha ki jaka pule ha kito ki snem.
“Nga kwah ban ai jingmut ïa ki nongïalam ba namar mynta ba ki la shim bun tylli ki ishu hynrei kim dei ban klet ïa ka pule puthi namar ka jinglong ki jaka pule bad ka jingdonkam ka jaidbynriew ïa ki samla ba nang ba stad ka long kaba khraw haduh katta katta,” u la ong.
Ha kane ka sngi la pynlait ïa kane ka phlim sah kynmaw ïa ki jingïaid lynti ka KSU ha ki 40 snem kata naduh u 1978 haduh u 2018 la pynlait paidbah da u Bah G Basan bad u Bah Michael Syiem ha ka jingdon ryngkat ki nongïalam bad ki dkhot kiba la shongthait jong ka KSU.
Lah ban kdew hangne ba ïa kane ka phlim sah kynmaw ïa ki jingjia kiba shisha naduh ba la seng ïa ka KSU haduh ba kan da dap 40 snem ak rta la pynkhreh naduh u snem 2018 ha kaba la pynbit pynbiang da ka State of Mind Production ha ryngkat ka jingïatreilang bad kiba bun ki kynhun bad ki nongtrei ba jarjar ka seng.