Pyrshah bad pynrem ka VPP ba kren u Lat da ka Hindi, mih jyndat na ïingdorbar

Shillong, Lber 20: Ka Dorbar Mangtyngka jong ka ïingdorbar ba thymmai, ka la sdang da ka jingïathnam hapoh ïingdorbar, ki Saw ngut ki MLA ka Voice of the People Party (VPP) ki la pynpaw ka jingpyrshah ïa ka jingkren Hindi u Lat, u Phagu Chauhan ïa ka jingkren lamphrang jong u ne ka Governor’s Address.
Mar syn sdang kren u Lat, u nongïalam ka VPP, u Bah Ardent Miller Basaïawmoit, u la ïeng ban pynpaw ka jingpyrshah ban ong ha u Lamphang ka ïingdorbar ba ka Meghalaya kam dei ka jylla kaba kren Hindi.
“Lyngba jong phi Mr. Speaker Sir, nga kwah pyntip ïa u Lat ba ka Meghalaya kam dei ka Jylla ba kren Hindi” la ongu Bah Ardent da kaba pynkynmaw ruh ba kadei ka jingthmu ka sorkar Assam ban pynrung jubor ïa ka ktien Assamese ba ka la mih ka jingïakhih ban ïoh la ka jong ka jylla kaba pura.
U Nongïalam ka VPP na Nongkren Ardent Millen Basaiawmoit ula ieng ban pyrshah mar mar hadien ba u Lat ka Jylla ula sdang ban ai jingkren da ka ktien Hindi ha ka sngi sdang jong ka Dorbar Mang tyngka ka Iingdorbar.
Shuh shuh u Bah u Bah Ardent ula ong ba ka kyndon pynïaid ïingdorbar ki kala kren shai ba ki jingiakren hapoh ka Iingdorbar Thaw Ain ka dei ban long da ka ktien phareng.
“Ka Sorkar India kam shym la pynsngap ïa ka jingdawa ka Jylla ban pynrung ia ka Ktien Khasi bad Garo ha ka khyrnit ba phra kaba la pynduhlad ia ka Jylla jong ngi. Namar kata, nga kyntu ïa phi kum u Lamphang ka ïingdorbar ba u Lat u dei ban kren sha ngi da ka ktien kaba ngi sngewthuh”, la ong u Bah Ardent.
Kane ka jingpynpaw pyrshah u Bah Ardent ïa ka jingkren Hindi u Lat, ka la pynlong ïa u Myntri Rangbah u Conrad Sangma ban knieh ktien da kaba pynpaw ka jingsngew diaw ïa ka jingleh u Bah Ardent, da kaba ong ba um sngewtynnad ba kane ka rukom leh kan mih na u dkhot jong ka ïingdorbar. Hynrei u Bah Ardent, u la ong ba lada u Lat u kren da ka ktien Hindu, kan pynlong ïa ki MLA ka VPP ban pyrta bad hylla hapoh ïingdorbar bad mar kumta hi, u la pyrta, “down down, ngi pynrem ïa u Lat ka Jylla namar ka jingai jingkren sha ngi da ka ktien kaba ngim sngewthuh”.
U Bah Ardent ula ong ruh ba kane ka jingphah ka Sorkar Pdeng da u Lat u ba kren beit da ka Hindi bad u bym nang kren phareng, kadei ka jingibeiñ bad ka jingbym kheiñ snep ïa ki nongshong shnong ka jylla Meghalaya, kaba kiba bun ki nang ne sngewthuh ïa ka ktien Hindi.
Namar kata, u Bah Ardent bad ki lai ngut ki MLA ka Party kila mih jyndat noh na Iingdorbar kum ka dak ba kim kwah ban ïadon bynta bad ka ka ïingdorbar kaba pdiang ïa ka jingkren da ka Hindi bad ong artad,, “Ai ba kita ki bym sngew ba ki shah ibeiñ kin shong hapoh ïingdorbar”.
Haba pynpaw ka jingsngewkhia halor ka rukom leh jong kine ki dkhot ka Liang Pyrshah, u Myntri Rangbah ka Jylla Conrad Sangma ula ong, naba u Lat ka Jylla um lah ban pule phareng, ïa ka jingkren jong u bala pynkylla ktien, la dep ban sam hapoh ka ïingdorbar kat kum ki kyndon bad kam don daw satia ïa ki dkhot ba kin pyrshah.
“Lada u briew um lah ban pule English, ngim lah satia ban shu pynbor ïa u. Ka jingkren bala buh jingthoh, la dep ban sam hapoh ka ïingdorbar. U khlem leh ia kane namar ba u kwah khnang, ula leh namar ba um lah ban pule. Ka long kaba sngewsih ban ïohi ïa ka jingbym burom ba kum kane ïa u Lat ka Jylla” ong u Conrad.
Lah ban kdew hangne ha ka snem 2018 ruh, ha ka por ba kren Lamphrang u Lat Ganga Prasad da ka ktien Hindi, ki MLA ka liang Pyrshah, i Kong Ampareen Lyngdoh, u Bah Adelbert Nongrum bad kiwei kiwei ki la pynpaw ka jingpyrshah bad ki la kren khyndiat da ka Ktien Khasi kum ka da ka jingpyrshah.