Yn kham pynleit jingmut ka Sorkar ha ka koit ka khiah, ka pule puthi bad ki surok, ong u Lat

Shillong, Lber 20 : U Lat ka Meghalaya, u Phagu Chauhan, haba ai jingkren lamphrang ha ka sngi ba sdang ka Dorbar Mangtyngka jong ka jylla, ula ong ba ka Sorkar kan kham pynleit jingmut ha ka liang ka koit ka khiah bad ka pule puthi.
Haba ai jingkren hapoh ïingdorbat hadien ka jingphet noh ki saw ngut ki MLA ka VPP, namar ka jingpyrshah ba u kren da ka ktien Hindi, u Lat u la ong ruh ba kiwei pat ki kam pynroi kiba ka sorkar MDA kaba ar ki long ha ka liang ka surok, ki jingkieng ka bording elektrik bad ka jingpynpoi ïa ka umbam umdih sha ki paidbah.
Ha kane ka jingkren kaba arphew sla, u Lat, u la ïathuh ruh ba kiwei pat ki bynta kiba ka sorkar kan shimkhia ki long ka jingkyntiew ïa ka kamai ka kajih ha ki jaka nyngkyndong bad ban kyntiew ïa ki kam sengkam lajong lyngba ki prokram kiba don bad ka jingthmu ban pynkylla ïa ka jingim briew kum ka rep ka riang, ka rep soh rep syntiew, ka kam ri dohkha bad ka kam ri jingri jingdup.
U Lat u la pynpaw ruh ka jingsngewkmen ba ka jylla ha kine ki snem baladep, ka la kiew bha ha ka liang ka jinglum khajna, khamtam ka GST, ha kaba u la ïathuh ba ka jinglum na ka GST bad kiwei pat ki khajna ka long 1078.25 klur tyngka bad 429.84 klur tyngka na ka GST bad kiwei pat ki khajna haduh kaba kut jong u Nohprah 2022.
U Phagu ula ïathuh ruh ba ka sorkar kan bteng ïa ka jingpyntreikam ïa ka FOCUS bad ka FOCUS+ ha kaba kumba phra lak tylli ki longïing kin ïoh jingmyntoi. Haba kam ba ka Jylla kala kiew bha ha ka jingshakri halor ka koit ka khiah, u Phagu ula iathuh ba ka Sorkar kala shna pynbha haduh 109 tylli ki jaka sumar bad 19 tylli la tei thymmai ban pynthikna ia ka bha ka miat jong ki paidbah ha kylleng ka Jylla.
Ha kaba ïadei bad ka jingtreikam halor ka koit ka khiah, u Lat u la ïathuh ba ka MOTHER Program ka la treikam bha ha kaba palat 2 lak ngut ki longkmie kila ïoh ïa ka jingkyrshan na kane ka prokram. Ka Sorkar kala sdang ruh ïa ka jingleit pynpoi dawai da ki sha ki jaka ba kyndong eh jong ka Jylla ha ka por kaba biang.
Halor ka Pule Puthi, u Phagu ula ong ba ka Sorkar kala buh hakhmat eh ban kyntiew kyrdan bad moramot kumba 1885 tylli ki Skul kiba don ha Jylla. Nalor kane, kala kyntiew ruh ïa ka tulop ki Nonghikai Adhoc da 50%, kaba la ai jingmyntoi ia kumba 10000 ngut ki Nonghikai, kaba lam sha ka jinghap sei pisa tam ba kot T. 81 klur shisnem.
Haba kren halor ka jingpynpoi umbam umdih sha ki Longiing sha Nongkyndong, u Lat ula ong ba ha ka por ba pyntreikam ïa ka JJM kaba la pyllait ha u snem 2019 da ka Ministry of Jal Shakti, ka Jylla kala don tang 4550 tylli ki Longiing ba la ïoh kor um ha ïing hynrei tang hapoh saw snem, kala kiew sha ka 2.9 lak tylli ki Longiing. Nalor kane, 1422 tylli ki Shnong kila ïoh pura ïa ki kor iing. U ong ba ka Meghalaya ka la wan ba-ar ha ka jinglah treikam bha ia ka JJM hapoh ka Ri.
Halor ka kam pynroi ha ki jaka sor, u Lat ula ong ba hapoh ka Smart City Programme shibun ki projek la pyntrei mynta ha Nongbah Shillong. Ka jingtei thymmai ïa ka Iew Laitumkhrah, Polo Commercial Complex, Smart Road, Integrated Control and Command Centre, bad ka Automatic Car Parking ha Motphran kila ïaid shaid shaid mynta.
Ula ong ba ka Sorkar kala shimkhia ruh halor ki sienjam ban weng ïa ka jingkhapngiah ka sor Shillong bad kala thied haduh 30 tylli ki bus ha ka dor ba T. 10 klur ban kit ïa ki khynnah skul. Ka Sorkar kala thied haduh 807 acre ka jaka ha Mawpdang-Mawkhanu ba pyniar ïa ka New Shillong Township.
Haba kren halor ka jingdonkam ban ïoh ïa ka bording kaba khlem thut, u Phagu ula ong ba ka Sorkar kala dep ban plie ia ka Phase-I jong ka Ganol Mini Hydro Electric Project ha u Kyllalyngkot 2023 bad da kane, ka Sorkar kala don ia ki bor ba lah ba 363.70 MW bad ba lah ban pynmih bording haduh 1100 MU ha ka shisnem.