Shillong, Risaw, 20: Ki shipai Border Security Force (BSF) jong ka 100 Battalion kiba ap pahara ha khappud West Garo Hills hynnin ka sngi Saitjaiñ ki la ïoh kurup ïa ki jaiñ ba la thmu ban khaïi tuh sha ka ri Bangladesh kiba shongdor T. 12 lak.
Ki shipai BSF kiba la ïoh jingtip na ki tnat syntiat ki la ïoh ban pynpulom ïa ka jingthmu jong ki snar khaïi ban shalan tuh ïa ki jaiñ sha Bangladesh. Tang shu ïohi ïa ki shipai, ki snar khaïi tuh ki la phet krad lailum laiwah da kaba shim kabu ïa ka jingrben jong ka khlaw bad iehnoh shadien ïa ki mar khaïi tuh.
Ha ka jingkhynra, ki shipai BSF ki la ïoh kurup bun tylli ki song ba la thep ïa ki jaiñ. Ïa kine ki mar khaïi tuh la aiti noh sha ka ophis custom.
