Shillong, K’lyngkot, 08: Ki shipai Border Security Force (BSF) jong ka 43 Battalion bad ki Pulit kiba la ïoh jingtip na ki tnat syntiat ha ka sngi Saitjaiñ ki la pynlong ka jingap ktem bad ïoh kurup palat 11000 kilo u kwai tyrkhong uba shongdor T.24 lak ïa uba la thmu ban shalan tuh na India sha ka ri Bangladesh.
Ïa kine ki mar khaii tuh, ki shipai BSF bad ki Pulit ki la ïoh kurup na ka shnong Dampukaphal kaba hapoh ka Rongra Police Station, South Garo Hills District.
Ïa une u kwai ba la pynkit ha ki lai tylli ki trok la ïoh bat da ki shipai BSF hynrei ki nongniah jong kine ki lai tylli ki kali tang shu ïohi ïa ki shipai BSF ki la ryngkang na kali bad phet lailum laiwah bad iehnoh ïa ki kali bad ïa ki mar khaii tuh shadien.
Ka tnat shipai BSF ka la ai jingïaroh ïa ka tnat Pulit jong ka Jylla Meghalaya kaba la ïashim bynta lang ha ka jingkhynra bad ong ruh kum kine ki jingkhynra kin dang ïai bteng ha ki sngi ki ban dang wan da ka jingthmu ban tehlakam ïa ki kam khaii tuh bad ki kam runar ruser ha khappud jong ka ri India bad ka ri Bangladesh.
