Shillong, Nailur 02 : Ki pulit ka jylla ha ka miet sngi Thohdieng ki la ïoh ban kem noh haduh sawngut ki nongkhaii drok kynthup ïa kawei ka longkmie ryngkat bad u drok ba shongdor haduh 6 klur tyngka.
Ka Anti-Narcotic Task Force (ANTF) jong ka East Khasi Hills District ha ka jingkhynra kaba la neh baroh shisngi khatduh ka la ïoh ban kem noh ïa kitei ki nongkhaii drok na kawei ka jylla sha kawei pat ha kaba kawei na ki kadei ka longkmie na Demthring, Shillong nalro ba ka ïoh ruh ban kurup shibun bha utei u jingdih beain, ong u heh pulit ka district, Bah Sylvester Nongtnger ha ka sngi Saitjain.
La ïathuh ba ïa kitei ki drok ba ïoh kurup la la thep ha ki 55 tylli ki synduk ba khia 638.5 gram, nangta la ïoh ruh ban kurup ar tylli ki mobile phone, kawei ka maruti suzuki Eeco ba don ïa u number AS14 AC 0984, kawei ka EPIC Card, kawei ka Aadhar Card u la ong.
Ki pulit ki la rejistar ïa ka mukotduma halor kane ka jingjia bad ka jingtohkit ka dang ïaid shakhmat.
