Shillong, Nailur, 02: Ki samla pule bad ki khynnah skul kiba pule ha ka kyrdan Higher Secondary ki la ïatyrko nia halor ki jingmyntoi bad ki jingduh jingmyntoi jong ka Artificial Intelligence (AI) ha ka 24th Dr MM Das Memorial All Shillong Inter College Debate Competition, 2023 ba la pynlong da ka Zenith Jubelieth Club ha Laban ha ka sngi Saitjaiñ ha kaba ka kynhun na St. Edmund’s College ka la ïohrah ïa ka nam lahduh.
Ka phang ïatyrko nia ka long, “Artificial intelligence has redefined the threat perception of human civilization”, ha kaba ka jingïatyrko ka la long kaba sngewtynnat na ka kynhun kaba kyrshan ïa ka phang bad ka kynhun kaba kyrshan bad kaba pyrshah bad ïa ka phang
“Ïa ka Artificial Intelligence la shna hi da u khun bynriew bad namarkata u khun bynriew un long u kynrad,” ka dei ka kyntien kaba la kren da uwei na ki nongïatyrko nia na ka kynhun kaba pyrshah ïa ka phang, bad uba la pynpaw ba ka jingpyndonkam ïa ka Artificial Intelligence ka la lam ruh ka jingjop jong ka mishon ba la pynher ïa u Chandrayaan-3.
Hynrei, kawei na ki nongïashim bynta na ka liang pyrshah ka la pynpaw ïa ka jingsngew ba ka Artificial Intelligence ka dei kaba buh jingma katkum ki dak ki shin kiba paw.
Ki don shiphew tylli ki kynhun ba la ïashim bynta ha kane ka jingïatyrko nia, ha kaba la sakhi ruh da ki phew ngut ki nongsngap, watla ka phang ïatyrko ka la shah pynliem ha ka ing baroh kawei haba u nongpynïaid jong kane ka jingïakop u Professor Sukalpa Bhattacharjee, Department of English, North Eastern Hill University (NEHU) u la ailad ïa ka ing ban pynpaw ïa ka jingsngew.
Ka kynhun na ka St. Anthony’s College ka la ïoh rah ïa ka khusnam kaba ar bad ka kynhun jong ka St. Edmund’s Higher Secondary School ka la ïoh rah ïa ka khusnam kaba lai.
Ïa ka Dr MM Das Memorial Championship Trophy la aiti sha ka kynhun kaba jop na St. Edmund’s College da u Senior Scientist ba la shongthait u Dr. Piyush Kanti Das.
