Kumba long manla u snem, 19 tarik yn pynkhuid ka Hima Mylliem ïa ka Ïewduh: Myntri War Tynghah

Shillong Ïaïong 16: Kumba ju long manla u snem ka ophis U Syiem Hima Mylliem ka pyntip ba manla u snem ka ju pynlong ïa ka jingpynkhuid kaba kham kyrpang ïa ka Ïewduh kaba ju long 3 sien ha ka shisnem nalor ka jingpynkhuid kaba manla ka Sngi da ki nongtrei jong ka Dorbar u Syiem ka Hima Mylliem.
Ha ka jingïakren bad u Myntri ka Hima Mylliem uba khmih ïa ka Tnat ka Khuid ka Suba (Sanitation) u Myntri War Tynghah u la ong ba kane ka jingpynkhuid ïa ka Ïewduh kan long ha ka 19 tarik mynta u bnai Ïaïong, 2026 kaba hab ha ka sngi U Blei bad ka jingpynkhuid kan sdang ha ka por 9 baje mynstep haduh ban da dep ka kam.
Shuh shuh na ka liang jong u Myntri u la ong ba ïa kane ka sngi ba la buh ban pynkhuid ïa ka Ïewduh kadei kaba hab ha ka sngi U Blei bad la shim khnang ïa kane ka sngi khnang ba u Kup shiliang u Sem shiliang uba im jakpoh un ïoh ban thied ban pet bad ban die khlem kano kano ka jingthut bad khuslai eiei halor kane.
U Myntri u la ong ba kane ka jingpynkhuid kan long ruh na ka bynta ka bha ka miat jong kiba bun Balang. U Myntri u la ong khnang ba kane ka jingthmu ka dorbar kan long kaba ïaid beit ïaid ryntih la wer ïa baroh ban ai ki jingkyrshan bad jingïatreilang bad la kyntu ïa ki khun ki hajar ban bud ryntih ïa ki jingbthah ba la buh kata kadei ba ki nongrep kim dei ban wanrah ïa ki marrep ha katei ka sngi, ki nongdie bad nongshong basa baroh kidei ban pynkhuid lypa ïa ki dukan bad ban sei ban lum lypa ïa ki ñuit shabar shwa ba kin khang ïa ki dukan jong ki ha ka janmiet jong ka 18 tarik mynta u bnai Ïaïong, 2026.
Kumta na ka liang jong u, ula bthah ruh ïa ki trai kali, ki nongñiah kali ba kim bit ban pynïeng kali ha shi lynter ka surok khap Ïewduh naduh Motphran, ka jaka ïeng Jeep (Stand Jeep), haduh Ïew Mawlong khnang ban lait na ka dheng kali ha katei ka sngi.
U Myntri Tynghah u la ong ba kane kadei ka jingangnud bad jingkyrpad jong u Syiem kumjuh ruh ka Dorbar na ka bynta ban wanrah ïa ka jingkhuid jingsuba jong ka Ïewduh khamtam ban bit ban biang ban suk ban saiñ ki nongdie nongthied bad ki nongleit nongwan ïew.