Bat ki pulit ïa 3 ngut ki nong Bangladeshi ba thmu leit sha jaka shong rel ha Assam

Shillong, Ïaïong 16: Ka khubor ba la ïoh na ki pulit la ïathuh ba ha ka 14 tarik mynta u bnai ha ka por kumba 9.50 baje mynmiet, ki pulit ki la pynlong ka jingtalasi ha kawei ka jaka kaba dang hab hapoh ka Mawngap PS (EKH) bad ha kane ka jingtalasi ki la ïoh ban khang kdong ïa kawei ka kali tourist kaba don u nombar ML-05T-8661 ba la ñiah da u Ialambor Mawlong.
Na kane ka jingïoh khang kdong ïa katei ka kali, ki pulit ki la ïoh ban bat ïa 3 ngut ki nong Bangladeshi, kiba la ithuh kyreng da ka Tahera Sheik ba la 20 snem ka rta, u Muishida Khanum ba la 29 snem ka rta bad ka Sahinur Begum ba la 29 snem ka rta kiba dang thmu ban leit sha Guwahati Railway Station, da kaba ki la ïathuh ruh ba ki don ka jingthmu ban leit shaduh ki jylla kum ka Gujarat, Bangalore, bad kiwei kiwei ki jylla ban leit wad kam bad ban trei bylla.