Shillong, Nailar 19: U Myntri Rangbah ka Jylla Meghalaya u Conrad K. Sangma ha ka sngi Nyngkong u la plie ia ka Degree College kaba hapoh ka shnong Rongjeng bad kane ka jingplie ia kane ka jaka pule ka la long kumba u la pynurlong ïa ka jingkular jong u Kpa (L) Purno A Sangma.
Lah ban ong ba kane ka college ka dei ka Rongjeng Model Degree College kaba u Myntri Rangbah ka Jylla ula plie ha ka jingïadonlang u Myntri ka Tnad Pule Puthi Rakkam A Sangma, u MLA ka thaiñ Jim Sangma bad kiwei kiwei ki riew pawkhmat na ka sorkar jylla.
Ha kane ka jingplie, u Conrad u la ong ba ka jingplie ïa kane ka kolej ha Rongjeng ka dei ka jingpyndep ïa ka jingkular jong u Kpa (L) Purno Agitok Sangma sha ki paidbah ka thaiñ. U la pynbna ruh ba ïa ka Rongjeng Model College yn ai nam ha ka kyrteng jong u Purno Agitok Sangma.
Lah ban ong ba ïa kane ka College la bei tyngka na ka RUSA 2.0 kaba dei ka skhim na ka tnad pule puthi jong ka sorkar India bad ïa kane ka jingtei la shna ha ka jinglut kaba T. 12 klur tyngka. Ka jinghikai jong kane ka degree college kan sdang mynta u snem da ka Arts stream.
U Myntri Rangbah u la pyntip ba ka Sorkar ka la dep ai jingmynjur ruh ïa ka song pisa ban pyntrei ïa ki surok kiba pynïasoh shaduh ka college, ka jingpynïoh umbam umdih, bad kiwei kiwei ki jingdonkam, ki bym dei kiba la mang lang ha ka jingshna ïa ka college. U pyntip ïa kine ki kam ba donkam ym sa pyndep nohshen.
Katba u Myntri ka tnad pule puthi Rakkam Sangma bad u MLA u Jim Sangma, ki la ai ka jingïaroh ïa ka jingïohi jngai jong u (L) P A Sangma na ka bynta ki paidbah ka Rongjeng.
