Shillong, Nailar 19: Ki shipai kiba don ha khappud ki BSF bad ka Bangladesh kila ïoh ban kurup ki tiar khaïi beaiñ sha Bangladesh, ba kynthup ïa ki jaiñ saree bad ka dor jong ki kaba la kot sha ka 58 lak tyngka ha khappud jong ka East Khasi Hills District bad ka Bangladesh.
Ki briew kiba kit ïa kitei ki tiar kila hiar wut wut sha khappud bad ka Bangladesh, hynrei na ka jingbeh kthong ki shipai BSF kila bret ïa ki jingkit bad phet sha khlaw, hynrei na ka liang jong ki BSF kila ïoh ban kurup ïa ki song tiar jong ki.
Haba ki BSF kila plied ïa ki song la shem ba ki dei ki jaiñ saree bad ki jingtah khmat bad kiwei kiwei ki jingpynbha briew kiba la mut ban shallan beaiñ sha Bangladesh, bad ki nongkit ki la ïoh ban phet sha khlaw.
Ha kawei pat ka jingjia ki kynhun shipai BSF 110 battalion kila ïoh ban kurup ïa ki ar tylli ki lieng dieng jong ki Bangladesh kiba la wan kiew sha khappud jong ka India, ki lieng nar kiba la wan rung sha Umïam ha Shella hapoh India ban wan khlong maw.
