Lap ka MACC bun ki wine store kiba die palat ka dor, don ruh ki bym don laisen kiba die kyiad

Shillong, Nailar 19: Ka Meghalaya Awaken Concern Citizens (MACC) lyngba u President u Bah Banshai Marbaniang bad u Secretary u Bah Churchill Syiemlieh ki la phah ïa ka dorkhas jingujor sha Commissioner & Secretary Legal Metrology Department Government of Meghalaya ba ki la lap ba ki don katto katne ki jaka die kiad ne ki Wine Store kiba la pynkheiñ ïa ka Legal Metrology Act, 2009, kaba la khang ïa kiba die khutia ban die ïa ki tiar ba kynthup ïa ka kiad ha ka dor kaba palat pud na ka dor ba la buh ne ka Maximum Retail Price (MRP). Ki la ong ba ka long kaba kongsan ba ki nongshong shnong ki dei ban tip ïa ki dor ba la buh da ka sorkar ïa kiba bun ki tiar kumba la buh ha ki label bad packaging, kaba mut ba kiba die khutia kim lah ban shim palat ïa ka dor kaba la buh ha ka MRP kum ïa ka kiad, beer, wine, bad ki tiar FMCG kum ki jait jingbam, ki tiar paiñkhana bad ki tiar ïing.
Nangta ïa ki tiar Electronic bad appliance, ki Pharmaceutical bad ki tiar dawai bad kiwei ki tiar. Kitei ki nongïalam ki la pynpaw ha ka dorkhas ba kiba die khutia kidei ban bud ïa ki kyndon bad ban die ïa ki tiar ha ka dor ne kaba long hapoh ka MRP. “Ka jingdie ïa ki tiar palat ïa ka dor MRP ka dei ka jingpynkheiñ bad ki lah ban shah shaiñ kuna, ki jingshah pynshitom bad wat ba kin ngat ha ki kyndon jingshah pynshitom jong ka aiñ. Bun ki jylla ha ka ri India ki la pyntreikam ïa kine ki kyndon ban khanglad na ka jingdie palat pud ïa ki tiar na ka hok jong ki nongthied,” ong kitei ki nongïalam.
“Ha baroh, ka Legal Metrology Act bad ki kyndon ka jylla ki thmu ban ïada ïa ki nongthied na ka jingshah shim palat pud ki dor khnang ba ki kam khaïi kin long kiba shai,” ong kitei ki nongïalam.
Haba phai sha ka phang kaba la kdew ha ka subject haneng, ki la ong, “Ngi kwah ban pyntip sha ka tnat ba kan shim ïa ki lad ki lynti ban ïada ïa ki hok nongshong shnong pyrshah ïa ki dukan kiad ne wine shop kiba la kylla long kiba die khutia ban die ïa ka kiad da kaba pynkiew ïa ka dor na kaba la buh hapoh ka Maximum Retail Price (MRP),” bynrap kitei ki nongïalam ka MACC.
“Ngi la leit sha ki wine shop ha kiba bun jaka ha kane ka nongbah, ngi la shem ba ki khlem bud shisha ïa ki kyndon bad ki aiñ. Shuh shuh ngi la lap ruh ba ki don ki wine store bapher bapher ki die ha ki dor bapher bapher ïa ki kiad kiba don kajuh ka MRP bad la lap ba ki la ai ruh ïa ki cash memo sha ki nongthied kiba la pan bad kyrpad. Hynrei ki don pat katto katne ki wine store ki bym ai ïa ki cash memo wat hadien ba la ïai kyrpad la bunsien. Ka daw jong ngi ka long ba kino kino kiba donkti ha kino kino ki kam runar ne pynkheiñ ïa ki aiñ, ka la pynkheiñ ruh ïa ka hok ki nongshong shnong. Kumta ngi kyrpad ïa ka tnat ban wengnoh ïa ki store ki bym ai ïa ki cash memo, da kaba ki la ai daw ruh ba kim lah ban naba kim don ki licence, kaba dei ruh kaba la khang da ka aiñ, kumjuh ruh ki kam beaiñ jong ki,” kynnoh kitei ki nongïalam.
Kumta ka seng ka la kyrpad ïa ka tnat sorkar kaba khmih ïa kane ka bynta ba kan pynlong ïa ka jingleit jurip kham kloi katba lah khnang ban lah ban kyntiew ïa ka jylla baroh kawei bad ka imlang sahlang. “Ha kawei pat ka liang ngi kyrpad ba ka hok jong ki nongshong shnong ki bym dih kiad ban kyrshan ïa ka hok kiba dih kiad naba kane ka dei ka jingjia ha baroh kawei ka jylla bad ka nongbah baroh kawei kaba shong nongrim hapoh ka jingïada jong ka aiñ,” pynkut kitei ki nongïalam, da kaba iathuh ruh ba ki don ruh ki wine store kiba die katkum ka dor ba la buh hapoh ka MRP bad kiba danglah ruh ban duna khyndiat na ka dor ba la buh na ka MRP.