Shillong, Naiwieng 14: U Myntri Rangbah ka jylla u Conrad K Sangma, ha ka sngi Palei u la shim bynta ha ka 13th JICA National Workshop on Forestry ha India, ha kaba ka phang jong kane ka prokram kadei, “Adapting Together: Community Driven Solutions for Climate Resilience”, kaba la sdang naduh ka 13 tarik bad kan kut ha ka 15 tarik mynta u bnai 2024 ha Taj Vivanta, Shillong bad ïa kane ka prokram la pynlong da ka MEGHALAYA BASIN DEVELOPMENT AUTHORITY (MBDA) hapoh ka Project for Community based Forest Management & Livelihoods Improvement in Meghalaya (MegLIFE) kaba dei ruh ka bynta ban pynneh pynsah ïa ki wahduid.
Ha kaba ïadei bad kane haba kren ha kane ka prokram na ka liang u Myntri Rangbah ka jylla u Conrad K Sangma, u la ong, “Nga shim ïa kane ka kabu ban ai khublei ïa baroh ki nongshong shnong kiba la don bynta ban pynlong ïa kane ka workshop kaba jop ban wanrah ïa ka dor jong ka MMR ha ka jylla ka ban long ka lad ban pule hapoh ka Harvard Business School kaba long ruh ban kyntiew ïa ka sawdong sawkun ha kane ka jylla. Haba ïasyllok bad ki dkhot kiba pule na ka liang jong nga nga la ïoh ruh ban ïasyllok bad ki kam kiba ïadei bad ka khlad noh ki longkmie ha ka por ba ki kha khyllung bad ki jingdonkam ban wanrah ïa ki jingkylla.”
Ha kaba ïadei bad kane na ka liang jong u Myntri Rangbah ka jylla u la ong ba ka donkam bha ïa ka jylla ban wanrah ïa kine ki jingkylla hapoh ka imlang sahlang.
Shuh shuh na ka liang jong u u la ong ba wat la ka jylla ka don kumba 76% jong ki khlaw la donkam pat ïa kiwei ki jaka kiba donkam ïa ka jingshim khia khamtam ban pynneh pynsah ïa ki wahduid ha ka jylla.
“Nga long uba kmen mynta ka sngi ban ïohi ïa ki jingshim khia jong baroh ki liang ban ïakhun ïa kine ki jingeh naba kane kam dei ka kam kaba suk ban wanrah ïa ki jingkylla,” u la ong.
U la ong ba u la pynpaw ka jingkyrmen ba kan sa don ka jingkylla ban ailad ïa ka kynhun kaba laitluid ban trei na ka bynta ka bha ka miat ha ka imlang sahlang.
Halor ki kam kiba kongsan na ka liang u Myntri Rangbah u la ong ba ka imlang sahlang kam lah ban shu ieh ia ki kam kiba donkam bha ha kaba ka sorkar ka la shim khia.
Ha kaba ïadei bad ka jingdonkam ka jingwanrah ïa ki jingkylla ha ka sawdong sawkun na ka liang u Myntri Rangbah u la ong, “Haba peit ïa ki kam ban wanrah ïa ka Payment for Ecosystems bad ki jingpyntreikam ïa ka, ka long kaba kongsan ban shim khia khnang ban lah ban khanglad ïa ki kam ban pynjot ïa ka sawdong sawkun bad kumjuh ruh kumno ban thaw lad ha ki kam ïohkam ïohjam da kaba sumar ïa ka mei mariang.”
U la pyntip ruh ha ka jingïalang ba ki la don haduh 5000 tylli ki wahduid da kaba pyndonkam ïa ki technology kiba long katkum ka juk kaba mynta ban pynneh ïa ka um da kaba buh ïa ki check dam kiba long kiba kongsan na ka bynta ban pynim bad kyntiew ïa ki symbai jingthung kiba long kiba kongsan bha ban leh ïa ki kam wad bniah.
Na ka liang u Myntri Rangbah u la ong ba ka sorkar jylla kan shim ïa ka bynta kaba kongsan ban kyntiew ïa ka JICA bad kumjuh ruh ïa ki nongshong shnong khamtam ïa ka MegLife, MBDA bad kiwei ki kam kiba ïadei bad ki kam wadbniah.
Shuh shuh na ka liang jong u u la ong ba ka JICA ka donkam ban treilang bad kiwei pat ki jylla kane ka thaiñ shatei lammihngi na ka bynta ban pynneh pynsah ïa ka sawdong sawkun kaba long ka bynta kaba kongsan bha.
Kiwei kiba la shim bynta ha kane ka jingïalang ki long u Dr. D. Vijay Kumar, IAS, Project Director, MegLIFE. Vineet Sarin, Chief of Development Operations, JICA India, u Rajesh S., IFS, Inspector General of Forest, Ministry of Environment Forest and Climate, u Sampath Kumar, IAS, Principal Secretary, Forest and Environment, Government of Meghalaya bad kiwei ki heh ophisar.
