Shillong, Rymphang, 24: Ka surok na IGP ter ter sha Khyndai Lad ka la thaba hi khrek bad da ki sur jingtem ha ka sngi Thohdieng, katba ki paidbah ki dang pdiang burom ïa u Myntri Rangbahduh ka ri u Narendra Modi, ha ka jingwan jngoh kaba shi sngi ïa ka nongbah Shillong bad ïa ka nongbah Tura, na ka bynta ban pan jingkyrshan ïa ki kyrtong ka BJP shwa ba ka jylla kan leit sha ka jingjied ïa ki nongmihkhmat ba thymmai jong ka Iingdorbar Thawaiñ ka Jylla.
Tang shu iuhkjat ha nongbah Shillong, u Modi u la leit ban leh burom ha durmot jong u Tirot Sing, u Kiang Nangbah bad u Pa Togan Sangma ba la pynieng ha phyllaw ka State Central Library shwa ban pynlong sa ïa ka ‘road show’ sha Khyndai Lad bad ban ai jingkren sha ki paidbah ha Khyndai Lad, kaba long ka kad khaii kaba thnem da ki nongleit nongwan bad ki nongthied nongpet.
Haba kren ha kane ka jingïalang, u Modi u la pan ka jingkyrshan na ki paidbah bad ong ba lada ka BJP kan ïohbat ïa u lakam synshar ha Meghalaya, kan pynsuk ïa u ban ïatreilang bad ka Sorkar Jylla na ka bynta ban theh ïa ki song pynroi.
U la ong, ka jylla ka la sahdien ha ka surok, ka lynti rel, ka kad liengsuiñ bad kiwei kiwei ki jingtei, kiba long ka roi ka kiew jong ka thaiñ bad ka Sorkar Jylla ka la long borabor ka dieng pyngkiang haba wanrah ïa kine ki projek.
Haba banjur ïa ka jingkylla, u Modi u la ong, “ka Act East Policy ka dei u païa uba khlaiñ na ka bynta ka roi ka kiew ym tang ha ka Jylla Meghalaya hynrei ha ka thaiñ Shatei Lammihngi baroh kawei. Lyngba ka Act East Policy, ka Sorkar Pdeng ka la lah ban kyntiew ïa ki kam jngohkai bad ka khaii ka pateng ha kane ka thaiñ.”
“Kito kiba la shah kyntait ha ka ri, ki bym pdiang shuh da ki paidbah bad kiba la don mynta ha ka jingkutlad ki pyrta shla da, “’Modi teri kabar khudegi’ (Modi, ka thliew na ka bynta jong phi yn sa tih). Hynrei ki paidbah na kyndong kynshrot jong ka ri ki ong, “’Modi tera kamal khilega’ (Modi, u syntiew lotos jong phin un phuh),” la ong u Modi.
Ki nongïalam ka Congress ha ka sngi Palei ki la pynlong ka jingpyrshah hadien ba uwei na ki nongïalam jong ki, u Pawan Khera, ula shah pynhiar na ka liengsuiñ ha Delhi kaba dang thmu ban leit sha Raipur.
U Khera u la shah kem ha kaba ïadei bad ka jingshah mudui ejahar halor ka jingkynthoh pyrshah ïa u Modi, bad tang hadien katto katne la pyllait jamin noh ïa u.
Ha ka rally, u Modi, u la ong ba ka India ka la nang kiew sha ki kliar jong jong ka jingjop bad ka Meghalaya mynta ruh ka la noh synñiang lang sha kata.
Ha ka jingïalang ha Tura, u Modi u la ong ba ka BJP ka la ïohi ïa ka jingkiew shaphrang jong ka thaiñ Shatei Lammihngi bad ka BJP ka la aiti na ka bynta ka jingkiew shaphang jong ki riewlum.
“San shah ka mang tyngka ngi la ai ban ïa kaba la bhah da ka sorkar Congress ka ju ai sha ki riewlum. Ki shnong jong ki riewlum hapoh ka jylla Meghalaya ki la ïoh ïa ka bording ha ka sien banyngkong naduh ba ka ri ka la ïoh ïa ka jinglaitluid, tang hapoh khyndai snem,” ula ong.
“Ngi la pynkhlaiñ ruh ïa ka jingpynïasoh ïa ki kad liengsuiñ ha Meghalaya bad ban pynieng da ki spah tylli ki 4G towers ha ki shnong ba la sah da ki riewlum jong ka jylla,” u la ong shuh shuh.
Shuh shuh u Modi u la ong ba hapoh ka Sorkar BJP, ki jylla ba marjan jong ka Meghalaya ki la kiew shakhmat ha ki kam pynroi.
U Myntri Rangbahduh ka ri u la banjur ruh ba ka Meghalaya ka donkam ban lait na ka saiñpyrthei shi ing shi sem.
“Ym tang ha Delhi hynrei ha Meghalaya ruh kumjuh, ki seng saiñpyrthei ba la pynïaid da ki shi iing shi sem ki la pynlong ïa ka jylla kum ka ATM ban pyndap ïa ka pdok lajong. Ki paidbah ki la kyntait ïa ki. Ka Meghalaya mynta ka kwah ïa ka Sorkar kaba buh buh shwa ïa ki paidbah hakhmat ym ïa ka iing ka sem,” la ïai ban u Modi.
Da ka jingshahniah ïa ki paidbah, u Modi shwa ban pynkut ïa ka jingkren u la ong, ‘ha kane ka kynti, u syntiew lotos un phuh ha Meghalaya.”
