Hato ki Sengbhalang ki tip ba ka Meghalaya ka ïoh tam 18 Sq Km ka jaka na ka Assam : Dy CM

Shillong, Rymphang 24 : U Symbud Myntri Rangbah ka jylla uba ïakhun ban shah jied biang kum u MLA jongka Pynursla Constituency na ka party NPP kaba u long kum u National Vice President, u bah Prestone Tynsong u la buh ka jingkylli mynta ka sngi na rynsan jongka jingïalap election jongu ha Langkyrdem, ïa ki Sengbhalang da kaba ong hato ki tip ne em ba ka Meghalaya ka ïoh tam 18 SQ.KM ka jaka na ka Assam ha ka jingïapynbeit pud ha ka wat kaba nyngkong kata kat kum ka Memorandum of Understanding ba la ïa soi ha Delhi.
U la kren ïa kane ka phang namar ba la jur palat ki jingkynthoh bad jingkynnoh ba ma u ( Bah Prestone) bad u Myntri Rangbah u Conrad K Sangma ki la die ïa ka Meghalaya sha Assam. Hato haba kumne kam dei kaba ki shu kynnoh khlem nongrim namar ka jingïoh nong ka dei ïa ka jylla Meghalaya. Wat kynnoh khlem nongrim tangba don kiba kren khlem tip tang katta la ïalam bakla ïa ki paidbah.
U la ong ba lada ka NPP kan wan phai ha ka bor kan shim khia ban pynbeit ïa u pud sa ha ka wat kaba ar kata ban wanrah sa ïa ka Block I bad II shapoh ka jylla bad kiwei kiwei ki jaka kum ka Langpih, Psiar bad ter ter. “ Ngim banse ban rai rangbah ban pynbeit ïa u pud u sam namar 50 tylli ki snem la ïaid ym don ba lah ban pynbeit dei tang ka sorkar MDA kaba la ïeng rangbah ban pynbeit khnang ba ki pateng kin tip la u pud u sam bad ba ka Assam kan ym ïoh kyntur pud shuh hynrei lada ym pynbeit mynta sa tang katno kan poi shaduh Byrnihat.
Bun ruh kiwei kiwei ki mat kiba u la kren ïa kiba yn sa pynmih bniah bha hynrei tang kawei kaba u la ong ba ka sorkar hapoh ka jingïalam ka NPP ka la leh bun kiei kiei kum ka jingrai ban pynkynriah ïa ki Kharmetor, ka jingplie noh ïa ka Crowborough bad kumjuh ruh ïa ka Arts and Culture Hall kaba ha Mawdiangdiang kaba dei ka hall kaba heh tam ha kane ka thaiñ. Ia kine don ba ïohi? em ym don namar ki lap miet ban peit kliaw tang kumno ban wohniah namar ba ki don bun kiba bishni ba ka dei ka sorkar kaba trei naka bynta ki paidbah.
U kyntu ïa ki paidbah ba kim dei ban ngop ha ki jingshah ïalam bakla jongno re hynrei ban pan ka jingpynshai na U Blei bad ban jied ïa ka NPP ha ka 27 tarik da kaba shon ïa ka shap ha ka dur jong ka Kot. Namar ym lah ban len wat la ka NPP ka shah kawang maw na baroh ki liang hynrei kat nang shah kawang maw katta ka lyer jongka NPP ka nang beh ha kylleng ki constituency jongka jylla Meghalaya.