“Ai ïa ngi ka ILP, ngin sa kyrshan ïa ka BJP” rah plakad ka HYC ha ka rally u Modi ha 9 Lad

Shillong, Rymphang, 24: “Ai ïa ngi ka ILP, ngin sa kyrshan ïa ka BJP” la thoh kawei na ki plakad ba la rah da da ki dkhot jong ka Hynñiewtrep Youth Council (HYC) ha ka jingïalang paidbah ba la pynlong da u Myntri Rangbahduh ka ri u Narendra Modi ha Khyndailad ha ka sngi Thohdieng.
Kan dei ka sien kaba nyngkong eh ba u Modi un pynlong ïa ka jingïaid paidbah ha Meghalaya bad ban kren sha ki hajar ngut ki paidbah ban pan jingkyrshan ïa ka BJP ha ka elekshon sha ka Iingdorbar Thawaiñ ka ban sa long ha ka 27 tarik mynta u bnai.
Ki dkhot ka HYC ki la rah ïa ki plakad ba la pynpaw ïa ka jingdawa ban pynrung ïa ka Ktien Khasi bad Garo ha ka Khyrnit Baphra jong ka riti synshar ka ri India.
U President ka HYC u Bah Robertjune Kharjahrin u la ong ba lyngba ki plakad, ka HYC ka shu pynkynmaw ïa ka Sorkar Pdeng bad ïa u Myntri Rangbahduh ïa ka jingdonkam ban sngap ïa kine ki jingdawa ba shongnia da kaba burom ruh ïa ki rai ba la mynjur da ka Iingdorbar Thawaiñ jong ka Jylla.
Da kaba ïai ban halor u kyrwoh ba la thoh ha ki plakad, u Bah Kharjahrin u la ong,“lada ki ai ïa ka ILP bad kin pynrung ïa ka ki ar tylli ki ktien ha ka Eighth Schedule, ym tang ma ngi hynrei bun ki ban ai jingkyrshan ïa ka BJP.”
Haba kylli ïa ka jingphiel jong ka BJP ban pynrung ïa ka ishu dawa ILP ha ka Manifesto, une u nongïalam ka HYC u la ong, “ka shong ha ka BJP ban sngap ïa ka jingdawa.”
Shuh shuh u la ong ba ki rukom kren ba ïapher ki wan na ka BJP halor ka ishu ha kaba ki nongïalam na rithor kin kren da kumwei katba ki nongïalam hapoh ka jylla kin ong pat da kumwei bad kaba pynshisha ba ka party kam shym la shimkhia ïa kine ki mat jingdawa.
U Bah Kharjahrin u la ong ba ka HYC ka ladep ïakynduh ïa ki nongïalam jong ka BJP ha Delhi la bun bun sien bad aiti ruh ïa ki dorkhas ha kiba bun ki khep ha kaba ïadei bad ka jingpyntreikam ïa ka ILP bad ka jingkylli ba dang donkam ban dang ïathir ïatai kam shongnia shuh.
U la bynrap ba ka jingkylli ka mih la ka BJP ka don neem ïa ka mon kum ka Sorkar ban ïada ïa ka snap bakyrpang jong ki ritpaid jong ka jylla Meghalaya.
“Lada ka BJP ka lah ban ai ILP ïa ka Manipur khlem da pynslem hynrei balei pat la pynslem ïa ka Meghalaya? Kaei kaba donkam ka dei shong eh tang ha ka mon jong ka Sorkar na ka liang jong ka BJP. Ym don eiei shuh ban dang ïakren, ban dang ïa thir ïatai, kaei hi kaba donkam ka long la ka BJP ka don neem ïa ka mon ban ïada ïa ka snap ba kyrpang jong ki riewlum ritpaid jong kane ka jylla Meghalaya, tang kata hi kaba donkam,” ong u Bah Kharjahrin.
Ha kaba ïadei bad ka jingkynnoh ba ka ILP kan ktah ïa ki kam jngohkai pyrthei ha Meghalaya, une u nongïalam ka HYC u la ong ba kam dei shuh ka kam kaba thymmai bad ka seng jong u, ka ladep ai jingmut ban pyni ba ka ILP kan ym ktah satia ïa ki kam jngohkai pyrthei ha ka jylla.
“Ngi ruh ngi tip kumno ban wanrah ïa ka aiñ ka ban ym ktah ïa ka kam jngohkai pyrthei. Ngi ladep ïakren shaphang kata. Da ka jingïarap jong ki kor ki bor katkum kane ka juk ba mynta, ngi lah ban leh ruh da ka e-ILP. Ym donkam ban aplai Offline te ha kano ka rukom kan ktah ïa ka kam jngohkai pyrthei,” u la ong.