Ka jubab ïa ki jingkynnoh pyrshah ïa nga kan dei da ka rai ki paidbah ka Mawkynrew

Shillong, Rymphang 24 : U Bah Banteidor Lyngdoh,uba dang pynkhreh ïalade ban shah jied biang kum u MLA ka Mawkynrew Constituency na ka seng PDF, u la ong ba kum u briew uba ngeit ba ki kam ki kham kren jam ban ïa ka ktien bad na ki kam kiba ula trei mynta san snem kum u MLA hi um don jingartatien ba ki paidbah kin dang pynjop ïa u kane ka elekshonMLA 2023 ka ban long ha 27 tarik mynta u bnai.
Haba kren ha khmat ki phew hajar ngut ki nongshong shnong ka Constituency ha ka jingïalang ïalap elekshon ha shnong Thynroit ha ka 24 tarik u Rymphang, 2023, u Bah Banteidor u la ong ba ha ki rynsan ïalap elekshon jong kiwei pat ki seng saiñ-hima ki mih jingkynnoh ba lai phew jait pyrshah ïa u hynrei ki paidbah kiba la sakhi ïa ki kam kiba u la leh na ka bynta ka Constituency kin sa jubab ïa kitei ki jingkynnoh.
Da kaba pynkynmaw ba shwa ka elekshon MLA 2018 u la rah ïa ki mat ba lada un jop un kyntiew ïa ka Constituency da ki kam pynroi bapher bapher, u la ong ba ka Mawkynrew ka la kiew ha bun ki liang da ka jingïatreilang bad ki bor shnong kumjuh ki paidbah nongshong shnong. “Nga buh ka jingshaniah ha phi ki paidbah bad ngam artatien ba ngan jop biang da ka jingieid jong phi”, u la ong
“Ka jingjop jong nga ka dei ka jingjop jong ngi baroh bad ngin ïaleh ban kyntiew ïa ka Constituency kham bun shah na kaba ngi la leh ha kine ki san snem”, u la ong da kaba ai khublei ïa ki paidbah bad baroh kiba la wan ban ïa don lang ha kane ka jingïalang. ” Ngin pynskhem ïalade ynda mih nangne ba ha ka 27 tarik ngin thep ïa ka vote da ka jingduwai bad 2 tarik pat ngin ïa kmen bad sdang ïa ki kam shaid shaid”, u la ong.
Kiwei kiba la ai jingkren ki kynthup ïa u Bah Tympang Pohshna, ka Dr Amanda Pakynteiñ kaba dei ka kurim u Bah Banteidor, u Bah James Ban Basaiawmoit, Vice President ka People’s Democratic Front nalor kiwei pat kynthup ki nongkitkam ka PDF ZONAL Committee Mawkynrew Constituency. La pynshong shit ïa ka jingïalang da ki jingrwai, jingshad tynrai na ka thaiñ, ki phawar bad kiwei pat.