Shillong, Rymphang 14: U President ka Bharatiya Janata Party (BJP) u JP Nadda ha ka sngi ba-ar u la kular ba ka party kan pynlong ïa ka jylla Meghalaya kaba lait na ka bamsap bampong namar ka la long ki maw jynthut ka roi ka par jong ka jylla.
“Dei na ka bamsap ba ka Meghalaya kam lah ban kiew shakhmat kumba ka dei ban kiew ha ka roi ka par, namarkata ka BJP ka wan hangne ban pynlong ïa ka jylla kaba lait na ka bamsap,” u Nadda haba ïalap elekshon na bynta ka party ha Mawbah, Shillong.
“Lada phi nang ban ñion ïa u budam ha ka sngi thep vote kan ïalam sha ka roi ka par bad ka jinglait na ka bamsap hynrei lada phi bakla kan ïalam sha ka jingsahdein bad ka jingbamsap ba shyrkhei,” u la bynrap.
U la kam ruh ba ha kine ki 8 snem kiba la leit la lah ban sakhi ïa ka jingpahuh ki kam pynroi kiba ym ju jia koit shuwa ba ka BJP kan syshar ha Delhi.
“Ka Meghalaya ka don la ka jong ka pakit ki mynnor, la ka jong ka lariti bad ka don ruh ka jingpyrshang ban kynjoh sha ka roi ka par hynrei kam ju lah satia ban kynjoh wat tang shisapit shuwa ban wan u modi ha ka bor,” u la ong.
U la kam ruh ba ka sorkar pdeng ka la mang haduh kumba 9 lak klur tyngka ha kine ki 8 snem na bynta ki kam pynroi bad 3,400 klur tyngka la mang lyngba ka North East Special Infrastructure Development Scheme (NESIDS).
shuh shuh u la ong ba ka India ka la kylla long ka ri kaba sted tam ha ka jingkiew ka ïoh ka kot namar ki policy kiba dei kiba u Modi u wanrah ym kum kiwei pat ki ri ba marjan kiba wanrah ki policy kiba pynhiar syndon ïa ka ïoh ka kot da kaba u ai nuksa ïa ka Sri Lanka bad Pakistan.
Na ka liang ka BJP ka kyrmen ba ha kane ka kynti kaba mynta ka kynti kan ïoh MLA palat ïa ki khat ngut namar ki paidbah ki la sngewthuh ïa ki kam kiba ka sorkar u Modi ka leh na bynta u paidbah.
Lah ban kdew hangne u Nadda u la wan poi ha ka sngi Ba-ar sha ka jylla ban wan jngoh na bynta ar sngi ban ïa kynduh ïa ki nongtrei ka party ban ïakren na bynta kane ka elekshon kaban sa long ha ka 27 Rymphang.
