Kular u Myntri Kam Pohïing ban pynshitom ïa ki pulit ba kawang tear gas ïa ki nonghikai

0

Shillong, Risaw 12 : U Myntri kam pohïing ka jylla u ma Lahkmen Rymbui u la kular ba ka sorkar kan pynshitom ïa kito ki pulit kiba kawang tear gas ïa ki nonghikai kontrak kat kum ki kyndon aiñ.
“ Ngin sa pynshitom ïa kito kiba ïaid lait na ka aiñ. Ngi dei ban sngewthuh ïa ka jinglong jingman ha kum katei ka por, ngi dei ban ïada ïa ki briew bad ngim dei ban phet rieh ruh hynrei shwa ba leh ei ei ngi dei ban ïaid kat kum ki kyndon aiñ” ong u ma Lahkmen.
Lah ban pynkynmaw ba ka United Democratic Party (UDP) dang shen ka la bthah ïa u ma Lahkmen ban pynshitom ïa kito ki pulit kiba kawang tear gar ïa ki nonghikai kontrak kiba ïakhih da kaba jai jai namar kane ka jingleh jong ki pulit ka la ktah mationg ïa ka sorkar bad ïa ki party kiba ïasynrop lang ha ka ba kynthup ïa ka UDP.
Kane ka jingkular jong u ma Lakmen ka long ruh hadien ba kawei na ki seng bhalang ka HITO ka la byrngem ban ïaid paidbah sha Secretariat ha ka Sngi Thohdieng namar ka sorkar kam pynshitom ïa ki pulit kiba donkti ha kaba kawang tear gas sha ki nonghikai.
U ma Lahkmen u dei ruh u myntri ba dei peit ïa ka tnad pule puthi bad u la pan ïa ka kaiphod na ki bor synshar district halor kane ka jingjia hynrei haduh mynta um pat ïoh satia ïa kata ka kaiphod. Kumta u la ong “ Nga tang shu ïoh ïa ka kaiphod ngan sa leh ia kaba donkam kat kum ki kyndon aiñ” ong u ma Lahkmen.
Na ka liang ka UDP ka la dep pynshai ruh ba ka khlem dawa hiar shuki ïa u ma Lahkmen hynrei ka dawa ba un pynshitom ia kito ki pulit ba donkti
U la ong ha kane ka sorkar synrop lang baroh ki myntri ki don ka bynta ban shim ka jingkitkhlieh lang ban shakri ïa ka jylla. Kane ka kam kam dei tang ka jong uwei ne ar hynrei jong baroh hi namar dei tang da ka jingïatrei lang kaba lah ban pynbeit ïa kano kano ka jingeh.

Leave A Reply

Your email address will not be published.