Shillong, Nailar 13 : U Myntri Khynnah ka tnad Tribal Affairs, u Bishweswar Tudu ha ka sngi Saitjaiñ u la kular ba un shimkhia ban ïa kren bad ka sorkar pdeng haba ïadei bad ki jingdawa kiba dang sahteng kiba dei na ka bynta ki paidbah ka jylla kaba ïadei bad ka jingpyntreikam ïa ka Inner Line Permit bad ruh ban kynthup ïa ka Ktien Khasi bad Garo ha ka Khyrnit kaba Phra jong ka Riti Synshar ka Ri.
“Bun ki Myntri jong ka sorkar pdeng kiba wan sha ka thaiñ shatei lam-mihngi jong ka Ri bad ki ju ai ïa ka kaiphod sha ka sorkar pdeng na ka por sha ka por. Kumta nga ruh kumjuh ngan sa ai ïa ka kaiphod bad ngan ïa syllok ruh halor kine ki ishu bad kadei kaba dei bn leh,” ong u Tudu haba kren bad ki lad pathai khubor.
Haba kren shuh shuh halor ka jingpynslem jong ka sorkar ban ai ïa ka rai halor ka Resolution ba mynjur da ka Iing Dorbar Thawaiñ ka jylla ban pyntreikam noh ïa ka Inner Line Permit, u Tudu u ong, “Ha ka sien ba ngan wan biang ngan sa ai ka jubab kaba shai lane nga lah ban pyntip ruh lyngba ki nongïalam ka party bad nga lah ruh ban ai jingmut sha ka sorkar.”
Utei u Myntri Khynnah u la kular ruh ban shimti ban ïakren halor ka jingdawa kaba la slem bha ban kynthup noh ïa ka ktien Khasi bad Garo ha ka Khyrnit kaba Phra.
