Shillong, Rymphang 27: U Myntri Rangbah, u Conrad K Sangma ula kular ba ka sorkar kan trei katba lah ka bor na ka bynta ban wanrah ïa ka jingshngaiñ bad jingïada na ka bynta ki paidbah kiba shong sah ha ki jaka khappud bad ka Assam namar ka jingle donbor ki riew shitniam Hindu ïa ki skul Missionary ha Assam.
Ïa kane u Myntri Rangbah u la ïathuh haba jubab ïa ka zero hour notice bala wanrah da u MLA ka UDP na Nongpoh Bah Mayralborn Syiem halor ka rai jong ki kynhun shitniam Hindu kiba la leit tah poster kylleng ka Assam ba bthah ïa ki skul Missionary ban weng lut ïa baroh ki mot niam bad ki Iingmane na ki jaka jong ki bad ban sangeh pyndonkam ïa ki jaka pule na ka bynta ka niam.
“Ngin sa pyntip ïa ki SP bad ki DC ba kin pynkhlaiñ ïa ka jingïaid pahara ka ban pynthikna ba ki paidbah kin ïoh ïa ka jingshngaiñ bad ba kin ïoh ruh ïa ki jingïada lada dei ban mih kano kano ka jingjia” ula ong.
Tangba u Conrad u la ong ba kam dei pat ïa u ban leh eiei khlem da wad ïa ka jingshisha. bad donkam ban pynshisha shuwa ïa kane ka khubor bad ki jingtip shuwa ban leh eiei
Nalor kane,u Myntri Rangbah ula ong ba u ju ïakren borabor bad u Myntri Rangbah ka Assam Himanta Biswa Sawma bad kumjuh ruh hapdeng ki Chief Secretary jong ki ar Jylla.
