Shillong, Rymphang, 27: U Myntri Rangbah barim ka Jylla u Mukul Sangma ha ka sngi Baar u la wanrah ïa ka Point of Order pyrshah ïa ka jingbym lah jong u Myntri Rangbah bad ki Myntri jong u ban don hapoh ka Ing ha ka jingïathir ïatai halor ka Mang Tyngka.
Haba ïoh ïa ka jingthylli kreng kreng ki shuki ha ka Treasury Bench, u Dr. Mukul u la wanrah ïa ka Point of Order bad ong ba ka Rule ka kdew, “u Myntri ba dei peit ïa ka tnat um dei ban mih na ka ing khlem ka jingbit jong u Lamphang.”
“(Hynrei), ngam ïohi satia uno uno ruh u Myntri, lymne ïa u Myntri Rangbah ne ïa kiwei kiwei ki Myntri ba la kham rangbah. Tang uwei u dkhot ka Kynhun Myntri (Rakkam A. Sangma), uba shong bad u bym bat satia ïa ka tnat (ba la ïatai). Namarkata, nga kwah ban kyntu ïa phi Symbud Lamphang ban pyntreikam da ka kyndon jong ka Procedure and Conduct of Business ha ka por kaba dei,” u la ong. Haba u Mukul u la kylli shaphang ka iktiar jong u shongknor halor kane kam, u Symbud Lamphang u Timothy D Shira u la jubaba da kaba ong, “ngan pyntip ïa ki (Myntri) ba kin wan.”
