Shillong, Rymphang 27: Ha ka sngi ba kut ka dorbar mang tyngka mynta ka sngi, ki dkhot ka Liang Pyrshah ha Meghalaya Legislative Assembly mynta ka sngi, ki la mih jyndat noh na ìingdorbar shuwa ba u Myntri Rangbah, u Conrad Sangma un jubab ïa ka jingïatainia halor ka mang tyngka.
Kane ka jingmih jyndat da ki MLA ka Congress, TMC bad VPP ka long ban pyrshah ïa ka Voting of Demand for Grant shuwa ba u Myntri Pla Tyngka un jubab ïa ka jingïatai ïa ka mang tyngka.
Haba wanrah ïa ka Point of Order ha ka sngi kut jong ka Dorbar mang tyngka, u MLA ka Congress na Umsning Dr Celestine Lyngdoh ula ong ba ka jingkren u Myntri Rangbah ka Jylla Conrad K Sangma, uba khmih ruh ïa ka pla tyngka, ba ka Voting on Demand for Grant ba ladep leh ha ka sngi Thohdieng ka dei na ka bynta ka Supplementary Demand, ka dei kaba bakla namar ïa ka Supplementary Demand ladep leh naduh ka 21 tarik Rymphang.
“Lada ngi ong ba ka Voting for Demand for Grant lah ban leh shuwa ka jubab u Myntri Pla Tyngka, ka mut ba kane ka jubab u Myntri haba kut jong ka jingïatai ïa ka mang tyngka kam don jingmut shuh,” ula ong.
U Dr. Lyngdoh u la ong ba kum u dkhot jong ka ìingdorbar, u kwah ba ka ïingdorbar ba kan bud ïa ki Rule. “Lada ka ïing kam bud ïa ki Rule, kaei ka jingmut ïa ngi ban shong hangne bad ban sngap,” la ong u MLA ka Umsning.
U Dr. Celestine ula kyrpad ïa u Lamphang ban weng noh ïa ki kyntien ba ula pyndonkam ba ki la shu pynsyrwa kai ïa ka por bad ban pynbeit da kaba pynbeit ïa ka jingkren ba ïalam bakla jong u Myntri Rangbah ba ong ba ka sngi Thohdieng ka dei kaba Vote ïa ka Supplementary Demand ka long kaba bakla bad kaba hap ban pynbeit.
“Lada ki dei ban vote ïa ka mang tyngka jong une u snem ha ka sngi Thohdieng, ka mut ba ngi la ïaid palat ïa ki kyndon jong ka rules”, la bynrap biang u MLA ka Congress na Umsning.
Ïa kane ka point of order u Dr. Celestine la kyrshan da ka All India Trinamool Congress (TMC) bad ka Voice of the People Party (VPP).
Haba ai ïa ka rai, u Lamphang Thomas A Sangma ula ong, “ngam don jingmut satia ban ong ba kane ka Iing ka la shu pynsyrwa kai ïa ka por. Ha ka jingshisha namar ka jingduna palat ka por, nga la bthah ban nym kren ïa ki kam ki bym donkam bad ban kren beit thik tang ïa ka mat. Hynrei, nga pynbeit noh ïa ka jingkren jong nga bad ïa ka kyntien pynsyrwa kai ïa ka por yn weng noh na ka jingïakren jong ka ïing”.
Hynrei, u la ong pat ba ïa ka ishu kaba ar, ki sngi pynlong ïa ka dorbar (calendar) ka dei kaba la rai hapoh ka BAC bad la buh ruh hakhmat ka ïing ha ka sngi sdang jong ka Dorbar myn ha ka 16 tarik Rymphang bad la ïa mynjur ruh da ka Iing. Katkum ka Rule, ka jingpynsangeh shipor ïa ka Rule lah ban wanrah da ka Parliamentary Affairs hynrei naba nga ladep ban ai ïa ka rai, kumta ka rai jong nga ka dei kaba kut” ula ong.
Namar ka jingbym hun ïa kane ka rai jong u Lamphang, ki Dkhot ka Liang Pyrshah na baroh lai tylli ki seng sain pyrthei, kila mih jyndat noh napoh ka Iingdorbar ban pyrshah ïa ka jingbym lah jong ka Sorkar ban pynbeit ïa ki jingbakla.
Haba ïeng ïada ïa ka Liang Synshar, u Symbud Myntri Rangbah ba khmih ïa ka Parliamentary Affairs Bah Prestone Tynsong ula ong ba ka rai jong u Lamphang ka long kaba shai bha. Naduh ka sngi nyngkong la wanrah (calendar) hapoh ka BAC bad hapoh ka ïing bad ka ïing la ai ka jingmynjur.
Haba u Dr Mukul Sangma ula ïeng ban ïasnohkti lang bad kiwei ki dkhot ka Liang Pyrshah bad ong ba ka jingmih jyndat ka dei kum ka jingpyrshah bad jingbym mynjur ïa kaei kaba ka Sorkar kaba leh, u Bah Prestone ula kynthoh “Ka Liang Pyrshah ka la pynman kale ïalade. Kane ka calendar (sngi shong dorbar) ka dei kaba la mynjur da ka Iingdorbar ha ka sngi sdang jong ka dorbar, kumno yn phai dien biang ïa ka.
Haba kdew ba kane ka jingleh ka Liang Pyrshah kum ka kam ka bym ïahap, u Myntri Rangbah Conrad K Sangma ula ong ba ki dkhot ka Liang Pyrshah ki la shu pynlong ishu khlem daw ha kaba ma ki hi dalade ki la ïadonbynta haba shim rai ha ka por ba ka Iingdorbar ka pdiang ïa ka calendar (sngi shong dorbar) ba la tyrwa da ka BAC.
U la kynnoh ruh ïa ka Liang Pyrshah ba kam kwah ban sngap ïa ka jubab halor ka jingïatai ïa ka mang tyngka hadien ka jingïohi ïa ki jait kam kiba la pyntreikam hapoh ka Jylla.
“Na kaei kaba nga sngewthuh, ki la waddaw ban ym sngap ïa ka jubab bad kumba nga ong, kine ki dei ki kam kiba kongsan namar ka jingkren halor ka mang tyngka bad ka jubab kan dei kaba phaikhmat sha kiba bun ki kam, hynrei yn ong kumno, ka dei ka rai jong ki bad ka Jylla baroh kawei ka peit ïa kane,” ong u Myntri Rangbah.
