Shillong, Rymphang 28: Ka kynhun ïalehkai phutbol jong ka Meghalaya kam don jingkyrmen shuh ban ïohrung sha ka quarterfinal ha ka lympung ïalehkai jong ka 77th National Football Championship na bynta ka Santosh Trophy 2023-24 hadien ba ka la ïakhaid ha bad ka Goa ha ka jingïakhun na ka thup jong ka Group A kaba la long ha Itanagar, hynne ka janmiet.
Kumban shu pynkynmaw, kaMeghalaya ka la wan kyrdan ba ar ha u snem ba ladep ha ka Santosh Trophy, hynrei mynta ka kynti ka la ïoh ban khur tang 2 point hadien ba ïakhaid bad ka Kerala bad ïa ka Goa hynne ka janmiet. Shuwa ban jam sha kane ka jingïakhun, ka kynhun Goa ka ladep ban pynthikna ïalade ban rung quarter final, katba ka Meghalaya ka donkam ban jop khnang ban pynneh ïa ka jingkyrmen ban ïohrung sha ka wat ba bud bad ïaknieh bad ka Assam.
Ha kane ka jingïakhun, na ka liang jong u Bah Khlain Pyrkhat Syiemlieh-Head Coach ka kynhun, u la wanrah jingkylla tang ha ar tylli ki bynta jong ki player. Ha kaba u la wanrah biang ïa u Lionel Rymmei ha jaka jong u Siwel Rymbai ban ap kol, katba u Banskhemlang Mawlong u la shim ïa ka bynta jong u Overkindness Lyngdoh Mawnai.
Haba bishar ïa ka jingïalehkai, lah ban kdew ba ka Meghalaya ka la ïalehkai bha khamtam ha ka kylla step, ha kaba ka la ïoh ruh katto katne ki kabu na u Sheen Sohktung ïa kiba u khlem shym la lah ban pynurlong.
Hynrei haba jam sha ka jingïakhun jong ka kylla miet, dei ka Goa kaba la ïoh ban tehlakam bun shah ïa ka bol, bad ka la ïoh ruh shibun ki kabu ba ka la shna hynrei ki la long kiba sepei namar ym shym la don ba thep ïa ki. Watla ka Goa kam shym la lah ban pynkhihjar ha kane ka jingïakhun hynrei ka la biang pat ïa ka kynhun ban bteng ïa ka lynti ïaid khlem ka namrem.
Nalor ka Goa, na ka Group A ka Services bad ka Kerala ki la pynthikna ban rung quarterfinal hadien ba pynliem ïa ka Assam bad Arunachal Pradesh da 2-0 kol.
Ka Meghalaya kan ïalehkai khadduh pyrshah ïa ka Arunachal Pradesh ha ka 1 tarik u Lber por 7 baje janmiet.
