Shillong, Rymphang 28: Ka kynhun ïalehkai jong ka Shillong Lajong SC ka la duh ei ban khur ïa ki lai point ba kongsan na ka jingïakhun pyrshah ïa ka Rajasthan United kaba la long hala ïing, kata ha SSA Stadium-Polo jong ka lympung I-League hadien ba katei ka liang pyrshah ka la lah ban pynphai shuwa ban kut ka por haduh 2 kol tang hapoh 2 minit ban pynïakhaid ïa ka jingïalehkai hynne ka jan miet.
Ha kane ka jingïakhun, ka Lajong ka la lamkhmat lypa da 4-2 kol hynrei shuwa ban kut artad ka por ba la pynjlan ïa ka jingïalehkai ka Rajasthan ka la ïohlad ban thep haduh 2 kol ban pynthikna mar shi point na kane ka jingïakhun.
Ka jingïakhun ka long kaba shongshit bad kaba itynnat bad dei ka Rajasthan kaba la ïoh pynkhihjar nyngkong lyngba u R. Gupta ha ka minit ba 12 jong ka kylla step, hynrei ka Lajong ka la ïoh ban pynphai ha ka 25 minit na ka kol ba la thep da u K. Lhuid.
Shuwa ban sa khylliap ïa ka por jong ka kylla step ka Lajong ka la ïoh thep ïa ka kol kaba ar na ka penalty ba la shut da u D. Tardin, kaba la pynlong ïa ka kynhun ban lamkhmat ïa ka jingïakhun.
Tang hadien katto katne ba la ïaid ka kylla miet, ka Lajong ka la shah pynduna shiphew ngut ha madan naba ïoh red card noh u A.Lyngdoh (49 minit) shuwa ba u R. Gupta jong ka Rajasthan un pynïakhaid ïa ka jingïakhun da mar 2 kol ha ka minit ba 50.
Watla ka kynhun ka la hap ban bteng ïa ka jingïakhun da tang shiphew ngut hynrei kam shym la kynrandien satia bad dei ha ka minit ba 80 ba u Goncalves u la thep ïa ka kol kaba lai, nangta bud sa ka kol kaba saw na u Phrangki Buam ha ka 85 minit kaba la pynshongshit ïa u paid nongkyrshan.
Hynrei hashwa ban kut artad ka por pynjlan ïa ka jingïalehkai ka Rajasthan United lyngba u Denzell (90+4 minit) bad na u Chhangte (90+6 minit) ka la ïoh ban pynïakhaid ïa ka jingïalehkai ban khur mar shi point.
Da kane ka jingïakhaid ka Lajong ka hiar sha ka kyrdan ba hynriew da 26 point naki 16 sien ïakhun, katba ka Rajasthan United ka dang ïaineh ha ka kyrdan ba 9 da 17 point naki 16 sien ïakhun.
Ka Lajong kan sa ïakhun pat ha ka 4 tarik u Lber pyrshah ïa ka Churchill Brothers shabar nala ïing, ha ka por 7 baje jan miet.
