Khur ka Madan Heh FC ïa ka song pisa ba 50 hajar na ka lympung 1st Knockout FT ka HANM Mawlai Syllaikariah Unit
Shillong, Rymphang 28: Ka Madan Heh FC ka la ïoh khur ia ka song pisa kaba 50 hajar tyngka hadien ba ka la ïoh rah ïa ka nam lahduh jong ka lympung ïalehkai kynjatbol ba 9 ngut shilliang kaba la tip kum ka 1st Knockout Football Tournament 9 Aside ba la pynïaid da ka HANM Mawlai Syllaikariah Unit.
Ka Madan Heh FC ka la jop da kaba pynliem noh da 5-2 kol ïa ka Mawlai Impact FC ha ka jingïakhun phainal ha ka sngi Balang ha Madanlyngkhuid Block 8, kaba don ha Mawlai Nongkwar.
Ha kane ka sngi la ïadonlang u Bah Wanseng Jyrwa u riew rangbah jong ka Mawlai kum u kongsan, Bah Lamphrang Kharbani President ba rangbah ka seng HANM kum u symbud kongsan, Bah Nelson Kharbani, Bah Bawan Nongsiej kiba dei ki vice president, Bah Venus, ki nongkitkam ka HANM Mawlai Syllaikariah Unit bad ki paidbah nongpeitkai.
Haba phai sha ka jingïalehkai phainal ka long kaba itynnad bad ïakhaid bha. Ka kylla step ka la kut da kaba ïathep mar shi kol. Dei ha ka kylla miet ba ka jingïalehkai ka la sdang ban kylla, ha kaba ka Madan Heh FC ka la ïoh ban thep ia ki saw kol kynthup ka shi kol ba la ïoh thep ei, katba ka Mawlai Impact FC ka ïoh ban pynshai tang shi kol.
Ha kaba kut jong ka jingïalehkai la sam ïa ki khusnam sha baroh ar ki kynhun ha kaba ka Madan Heh FC ka ïoh khur ïa ka song pisa ba 50 hajar tyngka ryngkat ka trophy bad ki takma katba ka Mawlai Impact FC ka ïoh 25 hajar tyngka ryngkat ka trophy bad ki takma.
U Bah Lamphrang Kharbani haba ai jingkren u la ong ba ka seng HANM ka ju pynlong ia kiba kum kine ki jait jingïalehkai ban pyllait ïa ki samla na ki jingmlien ba sniew khamtam na ki jingdih pynbuaid.
U Bah Wanseng Jyrwa haba kren kum u kongsan u la ai khublei ïa ka HANM kaba la pynlong ïa kane ka jingïalehkai kaban ai ka jingmut jingpyrkhat kaba khlaiñ, ka met kaba koit ba khiah bad ban pyllait na ki jingsniew kiba bun.
U la kyntu ïa ki samla ba kin pyndonkam hok ïa ka sap kaba U Blei U la ai khnang ba kin ïoh ban rah ïa ka nam ka burom ïa ka ïing ka sem bad ïa ka Jylla hi baroh kawei.
Ha kane ka sngi shuwa ban sdang ka jingïakhun phainal la ïoh ban pynïalehkai paralok hapdeng ka HANM seng kmie pyrshah ïa ka HANM Mawlai Syllaikariah Unit.