Ka Khasi Hills Autonomous District Council kaba la buh hakhmat eh ïa ka thong ban wanrah ïa ka jingkhuid jingsuba ha ki shnong ki thaw kiba dang hap hapoh u pud u sam jong ka Council ka la pan jingkyrshan na ka World Bank ban shna ïa ki Resource Recovery Centre da kaba sdang nyngkong eh na ki shnong kiba hap hapoh ka East Khasi Hills District. Ka District Council ka la buh hakhmat eh ïa ka thong ban wanrah ïa ka jingkhuid jingsuba ym tang ïa ki shnong ki thaw, hynrei wat ïa ki sawdong sawkun jong ka meimariang bad ïa ki um ki wah.
Ka buit ban shna ïa ka Resource Recovery Centre ka dei kawei na ki lad kaba lehse lah ban ong ba kan long ka jingkyrkhu ruh ha kawei ka liang namarba lyngba kane ka Centre yn pynïakhlad ïa ki niut kiba pyut ban pyndonkam biang bad ïa ki bym pyut ïa kiba yn dup lah ban pynïaid kam da kawei pat ka rukom. Kane kan long ruh ka lad ban pynkylla pisa ïa ki ñuit ba la bret na ki thliew iing jong ki briew.
Ki wahduid bad ki wah bah ki shu kylla sohpdung ei ha ka jingleh sat jong ki paidbah ki bym don shuh ïa ka mynsiem ïatiplem bad haba tih bniah ïa ki daw ka long ba ki paidbah kim kheiñ kordor ïa ka mariang kaba ai ïa ka lyer kaba khuid bad ka mariang kaba pyngngad. Ka jingbym biang jong ki jaka bret ñiut, ka pynlong ïa ki paidbah ban shu bret ïa ki jaboh jabaiñ kat shaba lap ba shem. Wat ka jingpynjari jong ka Sorkar ïa ki kyndon aiñ ba la mana ban daiñ kuna ïa ki nongpynkheiñ aiñ hynrei kam pynsheptieng satia. Kito kiba ju mlien ban pynkheiñ aiñ kin ïai leh kajuh shi kajuh ka kam tad haduh ba ka aiñ hi kan da leh da kaba tyngeh.
Shabas! Khasi Hills Autonomous District Council, kaba mih shakhmat ban pyntreikam ka Resource Recovery Centre, lyngba ka Solid Waste Management Programme. Ka jingpan jingkyrshan na ka Hima Mylliem kan ïarap shikatdei eh ban wanrah biang ïa ka jingkhuid jingsuba jong ka Iewduh kaba long ka kad khaii kaba heh tam ha kane ka Jylla Meghalaya. Ka jingbret pathar ïa ki jaboh jabaiñ kyndong jong ka surok ïaid kjat ha Motphran kaba long ka iitkhmih jong ka Iewduh ka la wanrah ïa ka jingsma iwtung bad ka jingijli ban peit ïa ka jingbym sngewthuh jong ki briew ïa ka jingkordor jong ka jinglehkhuid.
Sa kawei pat ka long ba ka District Council ka dei ban buh hakhmat ïa ka thong ban pynkhuid sa ïa ka wah Umkhrah bad ka Wah Umshyrpi namarba kine ki dei ki ar tylli ki Wah kiba tuid na ka dohnud jong ka sor Shillong bad kiba long ruh ka iitkhmih jong ka nongbah. Ka jingjaboh jong kine ki ar tylli ki wah kumba ka long baroh shikatta, ka dei hi na ka jingbym kheiñ snep jong ki paidbah ïa ka jingmyntoi jong kine ki ar tylli ki wah. Jin lada ka Wah Umkhrah bad ka Umshyrpi kin long kiba khuid khlir khlir khlempep kin don bun ki lad ban kamai pisa da kaba shna ïa ki jaka ban khring ïa ki nongjngohkai pyrthei kumba long sha kiwei kiwei ki bynta jong ka rilum Khasi bad Jaiñtia.
Ka District Concil hi marwei kan ym lah ban pynurlong ïa kane ka jingthmu, lymda ki bor Hima, ki bor shnong bad ki paidbah nongshong shnong kim ai ka jingïatreilang. Ka jingpynjari kyndon jong ki bor sorkar kin ym don jingmut lada ki paidbah hi kim don ka jingangnud naduh mynsiem bad ka jingkitkhlieh ïa ka jinglong bakordor jong ka meimariang.
